Yap uwi hei ya tyrrah kari ha Mihmyntdu

Hei miet ka 7 tarik uni u bnai heipor kamwa 10:00 waje haroh da em i ya tyrrah kari ha Mookynphad, Mihmyntdu hadooh wa poi chei khlaad uwi.

Ini i ya tyrrah kari toh hapyrdi ka kari kamai ka Alto 800 kawa em Number ML-04E-3742 kawa yah da u Kamdathrangemi Kyndait (20 snem) uwa na chnong Shkenpyrsit, West Jaiñtia Hills heiwa kani ka kari toh kawa kawa mih na Jowai yow lai cha Ialong wei da em leh ar ngut kiwi kiwa chong hapoh.

Tangwa manda poi ha Mookynphad, Mihmyntdu, kani ka Alto da tyrrah ko wa kawi ka Bolero Pickup kawa em Number AS-09AC-8591 kawa yah da u Golap Hussain (28 snem), uwa na chnong Bandali Reserve ka Assam uwa wan mar pyrchah.

Ha ini i ya tyrrah kari da takha joor bha ka Alto heiwa da mynsoo joor uwa yah katwa kiwa chong hapoh da mynsoo ki malu mala wei uwa yah ya ka Pickup won ym em mynsoo u iyi iyi.

Ki paidbah wa em chajan da kit ki ya kiwa em hapoh ka Alto cha WK Woodland Hospital, Sabahmuswang chwa wow poi ki pulit katwa ya uwa yah ya ka Pickup da lai yah oo cha Jowai Civil Hospital, Ialong yow pait yei long i man u.

Ya uwa yah ya ka Alto da booh hapoh ka ICU ka WK Woodland Hospital katwa kiwi ki ar ngut da pynlait ki hadien wa pait wa sumaar ki.

Hadien kattu katni por neiliang ka Hospital da pyntip ki cha ki pulit wa uwa yah kari da khlaad noh u.

Ynne i step hawa lai ki pulit cha Hospital da pyntip cha ki wa da e kti yei metyap cha kiwa ha-yung ha-sem khlem da pyntip chwa cha ki pulit.

Related posts

Pynlait paidbah ka kur Patlong ya ka kot ‘A Brief History of the Patlong Clan’

October 8, 2026

Mar ya dep u pynman yakob khwe theh symbe dakha wot ha Wah Mynriang

October 8, 2026

Hawa Phone ki pulit cha u pa uwa yap, da ong u wym em kwah ki wow lai chakhmat heiyatoh wa ini wa jia tangwa da phah wow wan ki cha Police Station manda lait por ki.

Ki pulit da taan ki leh ya waroh ki ar tylli ki kari cha Jowai Police Station.