Ka 3 tarik uni u bani da man ko ka wow sah kynmoo ya ka kur Patlong heiwa da yoh ko u pynlait paidbah ya ka kot parom ka kur kawa da e pyrtuid ‘A Brief History of the Patlong Clan’ kawa da thoh da ka Dr. Lambhadaka Patlong.
Ya kani ka kot da pynlait paidbah ha ka yalang wa da pynman ha yung kawa thoh ya ka kot ha Khliehiongriang, Jowai iwa da leh da u Dr. H.H. Mohrmen ha chirup i emlang u Eddystone Shylla kam u symbod kongsan, u Riquoma RQ Laloo waheh chnong warim ka Panaliar, u Heibormi Sungoh, u Pynbeit Laloo, waheh chnong ka chnong Khliehiongriang, ki waheh ka kur Patlong wa kattu katni ngut kiwa chah khut sñiawbha.
Neiliang u Dr. H.H. Mohrmen hawa e yei klam da yaroh u ya kawa thoh wa da chim ko kani ka luti wa khroo wow pynneh pynsah yei khanan parom heiyatoh wa ka kur khnang wa ki mandien u tip ki.
Ong u wa ka thoh ka taar man ko kawa kordor tam hei wow pynneh pynsah ya ka riti dustur. Da ong chooh chooh u wa ha ki por wa nachwa ki bru ym em thoh taar ki wei da pynneh pynsah ha u moo kiwa man ki dak wow pynsahnaam ya iwon iwon wa jia kiwa man ki parom wa hiar pateiñ.
Neilang u symbood kongsan da ong u wa katwon man iwa sarong ya ka kur wow yoh ya kani ka nongkynti kawa man ka hok ka wow tyngkai ya kawa u Blai da e u ha jar jiar i sap i phong. Da ban joor u leh yei emkaam u yatoh para kur deiwa ong wa i im chirup waka imlang sahlang man ko kawa emkaam bha tangwa emkaam chwa u tip u imlang chwa chiyung chisem wei bood sa ka kur.
Neiliang u Riquoma RQ Laloo hajrong ka phang wa ong yei tre ham ya mylliñ, da ong u waroh kiwa im ha pyrthai lada ym em i tre ym ye ki u im. Ka jaitbru kawa tip yei tre i thied man ko ka jaitbru kawa im. Da ban joor chooh chooh u deiwa ong ymphær lada yaphær i ha ka niam ka rukom næ hei rukom im rukom lai wei lada im i ha iwon iwon i thaw emkaam u kynmoo wei u tip wa i neiwon wan i wa i kiyi ki.
Da ong u leh ka riam ka bait man ko kawi kawa pyntip cha ka pyrthai yei man kyrpang yong i. Heijooh i por da kyntu u wow e ka kti timun tidiang, wym hoi u yataan i cha tre para i. Da pynkut u deiwa ong manda tip yei tre i thied heitæ yieñ rangbah ka yung ka sem.
Kiwi tawon kiwa klam toh u Heibormi Sungoh wa u P. Laloo kiwa da e yaroh ya kawa thoh deiwa kyntu ki leh ya ka kur ka jait u nang e bor e mynsien ki hawa em ki khon ka kur kiwa em i mynsien u kyntu kynrong yei thoh i taar.
Neiliang kawa thoh da e khublei kyrpang ko ya u Dr. HH Mohrmen wa u Riquoma RQ Laloo kiwa man kiwa yahluti wa kiwa pynchlur ya ka wow thoh ya kani ka kot.
Discussion about this post