Ki ar ngut ki khlieh synchaar yong ka jylla, u Montri Rangbah, u Conrad K Sangma wa u Lat ka jylla, u Satya Pal Malik da pynsñiaw ki ya jar jiar i rukom pyrkhat heiyatoh wa ka Scheme psiah kreh chipai wa thymme ka sorkar India kawa tip kam ka Agnipath Scheme ya kawa da pynbna ha ki tayaw wa dadep.
Neiliang u Lat ka jylla da ong u wa kani ka Scheme daw pyndooh mynsien ko ya ki chipai, iwa man katkam i klam uwi u chipai uwa da yoh ya i naam Param Vir Chakra, u Yogendra Singh Yadav. U Lat Satya Pal Malik da ong u wa ym em de i pynsakhiat kamwa da klam uni u heh chipai ha kawi na ki Interview.
Da ong u wa i pynkrehkaam ya kani ka Scheme daw pyntlot i ya ka chnat chipai ka ri, wei ki chipai leh ym em de i mynsien wa chongchit.
Hawa kylli, u Lat da ong u wa ya kani ka Scheme da toh wow pyndam noh wei i thung kreh u man bait i kam ha ki por wa dadep.
Chooh chooh hawa kylli na u Montri Rangbah ka jylla, u Conrad K Sangma da yaroh u ya kani ka Scheme wa wanrah da ka sorkar India, heiwa da ong u wa ha man la ki Scheme ki bru em bait ki jar jiar i rukom pyrkhat, tangwa neibynta i myntoi ka ri kani ka Scheme u man ko kawa bha tam wow pynkrehkaam.
Da ong u wa i pynbaad u em bait i, tangwa lada bichaar neibynta kiwa booon wa lang, ka Agnipath daw em ko chiboon i myntoi bar iwa doohmyntoi.
