Yow pynpsiah hei thij i pyrkhat ki khon khynroo khyllood wa lai puræ wa kammon u jied ki ya ki laiñ lai puræ waphær waphær i wow pynmyntoi ya ka mynried yong ki hadien habood, ynne ka sngi ka Thomas Jones Synod College Alumni Association chirup i yakrehlang waka Sacred Heart Career Academy da pynman ko yaka Career Counseling & Guidance Seminar ha Thomas Jones Synod College wa da chimbynta da ki khynnah wa dang yang Result Class-XII kamjooh kiwa dang lai purækani hi ka College.
Chwa u yoh i klam pynche na u M.K. Majumder, Director ka Sacred Heart Career Academy, neiliang u President ka Alumni, u Rev. L.O. Garod da pdiang burom u ya waroh kiwa embynta wa kynthup ya u Dr. Sanjiban Goswami, HOD St. Edmund’s College, u Prof. L. Khongiang, u Prof. K.Nongsiej, u H. Pasleiñ wa kiwi.
U E. Suting hawa klam yahkhmat ong u, kani ka Career Counseling emkaam bha ko boi boon napyrdi kiwa yang Result Class-XII dang em ki hei artatien deiyi u lai hadien wa yoh Result.
Heijoooh i por man ko ka wow yahluti khnang yow lait u jied bakla, neibhah boonsien wot iwa sñiawthooh ka luti wa jied leh dang bakla.
I daw wa bakla jied toh em i por wa ngait yei pynbor ka bei u pa næ bood ya ki lok, em i por neidaw wym yoh yei chah sikai, i e yumut heiyatoh wa ka mynried kamtæ hawa kut neh heh ha ka laiñ dooh khih dooh kreh.
Neiliang u M.K. Majumder, Director ka Sacred Heart Career Academy, hawa klam kam u bru chemphang da pynche da khana u ya ki Course waphær waphær wa ye u yoh khih yoh kreh hadien, deiwa kyntu leh wa hawa jied ya kawon kawon ka jait lai puræ emkaam u thooh bniah, u pait bniah nadong chadong nadooh ka jait Course wa i lut i sep.
Ong u leh wa em boon ki Course wym jooh johkhe najrong i duna i lut, i khih leh smat yoh, deiwa e nongmuna ya boon kiwa jied bakla yei lai puræ tæ sepai.
Pynrap u leh wa ha ka ri India hi, 50% na ki Doctor wa pyndep yei puræ ha ki jait waphær waphær wym em yoh kreh ki neidaw wa toh i rukom pyrkaht hi ha i wa manda dep puræ kwah bait i u yoh dei kreh sorkar.
Kamtæ da kyntu u wa toh u jied yei thaw puræ wa biang neibhah i myntoi wow yoh kylla toh iwa ye u jop heiwon iwon i jait Exam wa yakhun.
