Ka Montri Khynnah ka sorkar pyrdi wa pait ya ka Health & Family Welfare, ka Dr. Bharati Pravin Pawar ha ka 25 tarik da lai ko cha East Jaiñtia Hills District wow booddien ya i pynkrehkaam ya ki Scheme ka sorkar pyrdi.
Da ong ko wa i pynkrehkaam ya ki Scheme hapoh Meghalaya toh iwa lai bait heiwa ka MGNREGA da man ko 99% toh iwa jop. Da ong ko wa ha u snem wa dadep da yoh T. 33 klur ya ka MGNREGA, iwa da pynmyntoi ya ki 25,000 tylli ki manyung heiwa ha uni u snem da pynku chooh ya ka mang poisa wei da kmen ko yei pynkrehkaam ya ka hapoh East Jaiñtia Hills.
Da yaklam ko leh hajrong ka PM-Awas Yojana wow chna ki 882 tylli ki yung wei daw yaleh wow yoh poisa chooh chooh yow chna ya ki yung wa paka.
Chooh chooh ka Dr. Pawar da yaroh ko leh ya i pynkrehkaam ya ka National Rural Livelihood Mission (NRLM) hapoh ka District kawa yarap ya ki Self Help Groups (SHG) deiwa ong wa ki SHG yarap ki wow thooh ya ki khynnah wa duna i yoh baam da iwa biang.
Ka Dr. Pawar da kdaw ko leh ya i kreh ka chnat Public Works Department (PWD) heiwa T. 126 klur da e ha u snem wa dadep wow chna ya u sarok wa jrong 39 Km u sarok wow pynyabi ya ki 8 tylli ki chnong em ha khappood India-Bangladesh heiwa daw pyndep ya u sarok ha u snem wow wan.
Heiyatoh wa ki Primary Health Care (PHC) ka Montri da ong ko wa da pynku ya ka mang tangka na ka T. 1.80 klur ha u 2022 cha ka T. 2.60 klur uni u snem. Da pynche wa hapoh ka Pradhan Mantri Ayushman Bharat Health Infrastructure Mission da booh T. 1.23 klur wa T. 2.20 klur wow booh ya ki Diagnostic Labs wa ki Sub-Centre.
Hapoh ka Pradhan Mantri Jan Aarogya Yojana (PMJAY), toh kawa heh dooh ka Insurance Scheme wow e yarap hadooh T. 5 lak heiwa hadooh katni da em 17,000 ngut kiwa chah sumaar na ka District kiwa da myntoi wei ka sorkar da su ko T. 10 klur ka bai chah sumaar ki bru.
Da e khublei ko leh ya ka sorkar wa da em hadooh 88% kiwa da lai kha khon ha ki thaw sumaar iwa ku na ka 54% ha u 2021-22 cha ka 76% ha u snem wa dadep wei ha uni u snem da em 88%.
Chooh chooh hapoh ka Pradhan Mantri Krishi Sinchayee Yojana (PMKSY) da e hadooh T. 3 klur cha ki 180 tylli ki manyung.
Hapoh ka PM-Kisan Samman Nidhi da myntoi 10,000 ngut ki warep kiwa yoh T. 6000 cha ki Bank Account, kamjooh da kdaw ko ya ka Jal Jeevan Mission heiwa hapoh ka District da kynjoh 192 tylli ki chnong kiwa da yoh umkor heiwa 42 tylli toh kiwa dadep i kreh wei da e sorkar pyrdi da e ko T. 186 klur yow pynkhooid ya ka um wa khooid.
Ka Montri da ong ko leh wa da e hadooh T. 7 klur cha kiwa psan dakha ha jylla.
Ha ini i wan kani ka Montri da lai ko leh cha Dkhiah Health & Wellness Centre heiwa da yaklam ko leh wa ki ANM, ki ASHA wa kiwi kiwa kreh ha i chait i khiah. Ha Tuber Kmaichnong Village ka Dr. Pawar da yaklam ko wa ki dkhot ka Village Health Council deiwa yaroh ya u Waheh Chnong wa ki dkhot yong ka.
Discussion about this post