“Ki seiñ bynrap, ka Civil Defence wa Home Guards da leh ki chiboon iwa emkaam yow e yarap hawa emkaam jhan kam ha ki por wa pynyoo bor ka rymaw kamjooh heipor wa jia i mynsoo mynsnaam wa jia ya ki bru,” da ong u Comingone Ymbon, Montri ka Civil Defence & Home Guards, Meghalaya hawa e yei klam kam u kongsan haka lehkmen yaka sngi seiñ namo ka 61st Raising Day of Civil Defence and Home Guards, kawa da pynman ha CTI Parade Ground, Mawdiangdiang, Shillong haka 6 tarik.
U Coming da ong u leh wa ki Home Guards Volunteer da yarap ki leh wow pynlai kari, u e yada yaka yung Assembly wei wow yarap leh ya ki pulit wow yada ya ki Puja Pandal kamjooh heipor wa pynman tamasa wei yeini waroh hap wow yaroh.
Da ong u wa kini ki ar tylli ki seiñ bynrap da yarap ki ym du ya ki bor sorkar wa ki pulit, tangwa da lai e yarap ki leh wow e sikai ya ki paidbah, ki dorbar chnong kammon wow leh yow lada jia iwon iwon wa pynyoo bor ka rymaw, hawa iñ yung, ngam um wa kiwi kiwi de.
U Montri da pyntip u leh wa kani ka chnat da dep e sikai ko ya 7110 ki bru paidbah kamjooh ki khynnah skur heiyatoh waka Disaster Management, Search & Rescue wa First Aid ha ki thaw wa em cha sor wa cha palatsor. Wei ha u snem 2022-23, da e sikai leh ya 2531 ngut ki Home Guards Volunteers wa 330 ngut ki Civil Defence Volunteers wei katni dang em 1391 ngut ki Home Guards Volunteers kiwa dang chah hikai.
Neiliang ka I. Nongrang, IPS, Director General of Civil Defence & Home Guards, Meghalaya da khana ko chaphang i parom ki Home Guards kiwa da tip kam ki Local Defence Force kiwa da sdang nyngkong haka Thma Bah wa nyngkong ha United Kingdom, wei ha India ya ki Home Guards da sdang ha Bombay ha ka 06-12-1964 wei ya kani ka sngi da kynmoo kam ka Raising Day man-u-snem.
Hachwa ini, neiliang u Montri da pyndait u ya ki takma cha ki wa tip kam ka Home Guards and Civil Defence Medal for Meritorious Service cha ki 5 ngut ki bru ka Civil Defence & Home Guards wei da saam u leh ya ka Director General Civil Defence Disc & Commendation Certificate wa da e da ka MHA na New Delhi ha u 2022 cha ki 12 ngut.
Ka I. Nongrang won da saam ko yaka khusnaam Director General of Civil Defence and Home Guards, Meghalaya Cash Prize & Commendation Certificate, 2021 cha 6 ngut ki Civil Defence & Home Guards deilang waka song poisa.
Discussion about this post