U Prime Minister ka ri, u Narendra Modi hawa e yei klam ha ka 104th Episode ka ‘Mann Ki Baat’ da yaroh u ya uwi na ki nong Meghalaya, Brian D Kharpran Daly yei kaam yong oo wow lai thooh wei lai chim yukheiñ ya ki krem wa em hapoh ka jylla.
U Brian da ki phaw snem kattu da kreh chitom u wow pyn pawnaam ya ki krem wa em hapoh ka Meghalaya.
U Prime Minister hawa khana chaphang u Brain da ong u wa sñiawkmen u wow khana yei parom u Brian D. Kharpran, uwa chong chnong ka Meghalaya uwa ka-it yei kaam wow lai psiah krem wa tip kam ka Speleology. U Modi da khana u leh wa u Brian da sdang u wow kwah u tip chaphang ki krem hadien wa puræ ya kiwa boon ki kot wei ha u snem 1964 da lai psiah krem u heipor wa dang lai skur u.
U Modi da khana u leh wa ha u snem 1990, u Brian deilang wa ki lok yong oo da chna ki ya ka seiñ yow lai thooh bniah ya ki krem kiwa boon ki wym pu em wa tip wa em ha Meghalaya.
Chooh chooh u Prime Minister da ong ko u du hapoh kattu katni por donhi da ye ki wow chem palat 1700 tylli ki krem ha Meghalaya iwa da rah yei naam ka jylla hakhmat ka pyrthai, kamtæ u Modi da pynkynmoo u leh ya kiwa chong chnong ka ri wa ki krem wa jrong wei kiwa yillu dooh hapoh India em ki ha Meghalaya.
Da yaroh u leh ya u Brian Kharpran wa ki bru yong oo kiwa da pynlut por wow puræ bniah ya kini ki krem nadooh ki dakha, ki datham wa kiwi kiwi de kiwa em ha ki ki wym em chem chawi hapoh pyrthai.
Kamtæ u Prime Minister da kyntu u ya kiwa chong chnong ka ri wow lai cha Meghalaya yow lai psiah cha kini ki krem wa pawnaam wa kiwa miat bha.
Discussion about this post