U MLA ka Jowai, u Wailadmiki Shylla hawa e yei klam hapoh ka yung dorbar ynne ka sngi kam chibynta wow ya phyllu ya ka mang tangka ka sorkar, da e khublei u ya chiboon iwa da leh da ka sorkar MDA hapoh ka West Jaiñtia Hills kam i wanrah ya ka Wahiajer Multi Sports Complex hei lut wa T. 25 klur.
Da ong u wa ka chnong Jowai toh kawa chah ieh khonswet tangwa deiwa wan ka sorkar MDA da wanrah chiboon i kylla wei da yaroh leh da kiwa boon kiwa da em hei kreh sorkar da boon snem tangwa dang emkaam wow leh chiboon khamtam ha ki yaleh Sports ha waroh hi ka ri-loom Jaiñtia heiwa da emkaam wow pynchna pynmait ya kiwa da em chwa kam ka Basketball Court wa em ha Kiang Nangbah Stadium kawa da sih bha wei ym em leh kawa biang ka Indoor Hall.
Da kdaw u leh yei wym em ki Coach nadooh ha ka Cricket, ka Football kamjooh kiwi ki jait yalehke wei lada ym ye u e Coach ha waroh ki District ka jylla tangwa emkaam wow em ki Football Coach neibhah toh ka yalehke wa maya da kiwa boon ki khynroo wei daw ye ko leh wow e kreh ya kiwa boon ki khynroo ka jylla. Kamtæ da dawa u wow booh ya ki Football Coach kiwa da biang kyrdan hapoh ka West Jaiñtia Hills District.
Da dawa u leh wow booh sa kawi ka College sorkar hapoh ka ri-loom Jaiñtia kawa em du kawi donhi katni ha East wa West Jaiñtia Hills heiwa ini wa dep wa ha u snem wa da lai da em da ki spah ngut ki wym yoh thaw puræ.
Da ong u wa lada ym ye wow booh sa kawi ka College sorkar, ka sorkar ye ko wow kyrchaan ya ka Thomas Jones Synod College Jowai yow man ko kam ka People’s College. Chooh chooh wow pynku ya ka tulop kiwa sikai ha ka Morning Section ka KNGC kiwa da yoh du T. 5000 chi bnai deiwa pynku ya kani ka cha ka T. 20,000 chi bnai.
Ya ka Government Girls’ Higher Secondary School Jowai da dawa u wow pynchna thymme ya ka yung skur da kawa emlang leh ya ka Hostel wei wow pynmankaam leh yei booh ya ka Engineering College ha Shangpung.
Heiyatoh waka chnong Jowai da ong uwa hanla da kheiñ ya ka kam ka chnong sor tangwa hadooh katwon wow ye sakhiat u khut ya ka kam ka chnong sor heiwa nachwa naka chnat Urban Affairs da yoh ko du T. 20-30 lak chi snem tangwa katni won da yoh ko T. 1.5 klur hadooh T. 2 klur chi snem. Da yoh leh T. 10 klur yow pynman ya ka kam ka Smart Town, T. 23 klur yow chna pynmiat ya ki sarok ka chnong wa T. 20 klur yow chna ya ka Mini Secretariat.
Da kdaw u leh yaka Jowai Water Supply Scheme kawa nadooh u snem 2003 kawa da chah ieh hi-eh tanwa katni da jan pyndep ya ka. Da e khublei u ya ka sorkar wa da jied ko ya ka Thadlaskein kam kawi na ki thaw wow booh thaw sah wa syad dor neibynta kiwa uiñke suwari.
Neibynta ka Behdieñkhlam da e yarap T. 6 klur yow pynmiat ya ka Aitnar ha Jowai.
Da pynsñiaw u leh yei sñiawkmen ya ka poisa wa T. 230 klur wa da booh bhah da ka sorkar ha ka mang tangka neibynta ki sarok hapoh ka District.
Heiyatoh won wa i thaw noh jhep ka chnong Jowai, da ong u wa ini toh i kaam wa da sahteiñ la 30 snem deiwa pynkynmoo wa ya ka Jowai Municipal Board da sdang nadooh u snem 1995 hadien wa pyndam ya ka Jowai Town Committee tangwa i pynkhreh wow booh da ka Municipal ym toh iwa biang wei khlem da chynna jngai deiwa pynsñiaw leh yei sñiawngooh ya u MLA warim, u Dr. RC Laloo uwa da pyrchang wow pynbait ya ini i kaam wei ka Board leh da dep yoh ko yei thaw wow pynlang jhep ha Sabahmuswang wei ini waroh ym toh iwa suk u leh wei iwa chit bha.
Da e khublei u ya ka sorkar wa da yaleh ko wow pynbait syndon ya ini deiwa e khublei leh ya uwa yahkhmat ka Liang Pyrchah uwa da ong wa lada ym ye u MLA wow pynbait yeini i kaam yoh thaw noh jhep daw rem Election u. Hajrong ini, u Wailad da ong wa yooluti u yei wan ki wow e yei kyrchaan yow ye u pynbait noh ya ini i kaam.
