Shillong: Ynne ka sngi, ki dkhot ka HYC Nongstoin Circle da yoh ki wow kbai u kyriaw dawa Inner Line Permit (ILP) ha hakhmat u Montri Rangbah ka jylla, u Dr. Mukul Sangma.
Ka HYC da pyrchang ko boonsien wow rah ya ki placard wow pynsñiaw yei dawa ha khmat u Dr. Mukul tangwa ym jooh yohlaad ko, tangwa ynne ka sngi dei wym poi pyrkhat u Dr. Mukul da yachem u khak wa ki dkhot ka HYC Nongstoin Circle ha Laimer, Upper Shillong katwa oo dang lai luti u cha Mawphlang wow wai ya u moo-yurim ka Shillong Science & Commerce College.
Neidaw wa ka kari u Montri Rangbah ym yoh laad ko u pynhær smat ki dkhot ka HYC da yoh laad bha ki wow kbai u kyriaw dei yong wa em yow sñiaw bha u Dr. Mukul ya ki.
Kini ki dkhot ka HYC Nongstoin Circle kiwa em kamwa 70 ngut da wan poi ki ha Shillong chirup wa ki placard wa ki kyntien wa thoh ki hadien le sngi wa sdang ya ka lai kjat nadooh na Nongstoin.
Uwi u dkhot ka seiñ u Oliver Marngar da oor u neidaw wa joor i ngiah manda poi ha Laimer hadooh wa rah noh ya oo cha Shillong Civil hospital.
Ha kani ka lai kjat da em leh uwi u ksaw uwa bood lang ya ki nadooh Mawngap hadooh wa poi ha ka thaw yieñ kari ka Additional Secretariat.
Kini ki dkhot ka HYC Nongstoin da e ki leh ya ka dorkhat ki phang dawa ki ha ka kamra krehkaam u Montri Rangbah kiwa kynthup nadooh i chna ya ki sarok, ki college sorkar, i eh i khoo ki warep wa kiwi kiwi.
Hawa yaklam wa kiwa pathai khubor, u President ka HYC Nongstoin Circle, u Lumlang Kharsyiemlieh da ong u wa i laikjat ki dkhot ka seiñ toh wow pynsñiaw pyrthai yei iehbeiñ ka sorkar ya ka West Khasi Hills wat hadien wa dap 21 snem i yoh ya ka district.
Da ong u wa ka seiñ da phah thoh ko hadooh 7 sien wow yachem ya u Montri Rangbah yow yaklam ya iwa emkaam yong ka district tangwa hadooh katni ym em jubab ya ki.
U Kharsyiemlieh da ong u wa lada ka sorkar ym leh ko iyi iyi hei yatoh wa i dawa ka seiñ, ka seiñ ym yohsa ko wow chim da kiwi luti.
Discussion about this post