Ye ka NPP u yakrehlang wa ka Congress hapoh ka jylla: Dr. W.R. Kharlukhi

Shillong: Ka National People’s Party (NPP) ynne ka sngi da e kse ko wa ye ko u krehlang chirup wa ka Congress hadien ka Election hapoh ka jylla.

U President ka NPP Meghalaya, u Dr. WR Kharlukhi hawa klam hadien wa chna ya ka NPP East Jaiñtia Hills da ong u wa ka Party man ko kawa smat u krehlang wa kiwi ki party wa kynthup ya ka Congress lada emkaam hadien ka Election.

Da ong u leh wa hadooh katni leh ka NPP yooluti ko wa daw chna sorkar hi ko dei bor samen yong ka hapoh ka jylla.

U Dr. Kharlukhi da kyntait u leh ya i pynbaad kiwa yahkhmat ka Congress wa ka NPP toh ka jooh waka BJP deiwa ong wa ka Party em ko jar jiar ki phang krehkaam wa i rukom pyrkhat wei toh du nei krehlang wa ka BJP ha Delhi wa ha kiwi ki jylla ym em mut wa man ko ka jooh ka Party.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Chooh chooh da ong u wa ka Party lada u krehlang ko wa ka Congress ym em mut wa ka Party man Congress noh neibhah i krehlang toh neibynta u wanrah ya ka roi ka paar hapoh ka jylla.

Da ong u wa hadooh katni ka NPP u yakhun pyrchah ko wa ka Congress wei ya kawa hadien ympu nood u ong lada daw krehlang namo ym krehlang.

U Dr. Kharlukhi da ong u wa ka rai wa khaddooh wow krehkaam wa kiwon kiwon ki Party chong ko hadien ka Election.

U heh ka NPP da pynrem joor u yei pynbaad u Montri Rangbah ka jylla waka President ka All India Mahila Congress wa ka NPP yoh ka “Team B” ka BJP deiwa ong wa ymye u pdiang yeini i klam yong ki wei da pynyoo leh wa ka Congress ka yoobeiñ ko ya ki paidbah.

Da pteiñ u deiwa ong wa ka Congress ym em ko ki phang wa biang ha kani ka Election neitæ i daw da pynjoor ko du wow kynthah donhi ya kiwi ki Party.

Da beiñ joor u ya ka sorkar u Dr. Mukul deiwa ong wa katkam wa chem ka India Today ka jylla Meghalaya em ko cha tre na waroh ki jylla wa khian hapoh ka ri hei rukom ku ka roi ka paar.

Ha kani ka sngi ka NPP da pynbna ko leh ya ka Havergil Bareh kam ka kyrtong na West Shillong Constituency, katwa na Khliehriat da pynbna ya ka Violet Lyngdoh.