Ye u ku dor i phniang neiwa sahkut ki jhaad na iwa jia ha Iran

I dor phniang (Crude Oil) hapoh pyrthai da sdang i wow ku hadien wa sdang chah dat Bomb ka Iran ha ka US wa Israel wei kattæ da chah ktah leh kiwi ki ri wa em ha Middle East deiwa siat kylla ka Iran ha waroh ki thaw wa em ki chipai ka US.

I dor phniang Brent Crude da ku da 10% cha ka $82 chi Barrel ynne hadien wa le tylli ki jhaad kit phniang da chah siat ki ha ka Strait of Hormuz ha kini ki ar sngi wa dep. I dor ka Natural leh da ku da 25%.

Kani ka Strait of Hurmuz toh ka luti wa pynemkaam ki jhaad wa kit phniang yow lai rah cha kiwi ki ri ka pyrthai nadooh ka India, China, Japan, France wa kiwi de.

Lada jia wa chah khang kani ka Strait of Hormuz deiwa leh ka Iran, daw sahkut iwa boon i phniang wei kamwa man kattæ da em boon ki jhaad kiwa khlem yoh de u mih na kani ka Strait of Hormuz. Da em leh i maham na ki Revolutionary Guards ka Iran kiwa phah ya ka VHF Transmission cha waroh ki jhaad wym chah u lai luti ki na kani ka Strait of Hormuz.

Kani ka Strait of Hormuz kawa kmai du 33 Km donhi ka luti duriaw, em ko ha ka Gulf of Persia wei toh kawa em pood wa ka Iran, UAE wa Oman wei ki jhaad wa lai na kani ka thaw toh kiwa kit ya 20% na waroh i phniang wa pynekaam ha pyrthai iwa mut 17 Million Barrel chi sngi kiwa pynmih da ki 8 tylli ki ri, kitæ ka Iran, Iraq, Kuwait, Bahrain, Qatar, Saudi Arabia wa ka UAE.

Related posts

Wiar ka khynnah kawa na West Jaiñtia ha East Jaiñtia Hills

March 2, 2026

Pynmih ka Home Ministry ka India yei maham cha ki jylla wow paitbniah ya kiwa yachah Iran

March 2, 2026

90% i phniang wa pynmih da ka Saudi Arabia, Kuwait wa Qatar toh kiwa lai lyngba kani ka Strait of Hormuz yow poi cha kiwi ki ri ka pyrthai wei ka ri wa ye u chah ktah bha toh ka India kawa wanrah kamwa 60% i phniang na ki ri kiwa na Middle East deilang ka China kawa wanrah 40% i phniang na Middle East wei sa kawi ka ri wow chah ktah bha toh ka Japan kawa wanrah 90% i phniang na baar ri. Kamjooh ka ri wow chah ktah leh toh ka Pakistan kawa yoh 90% i phniang na ka Strait of Hormuz.

Lada chah ktah ka China kawa pynmih ya kiwa boon ki mar, da chah ktah leh deilang waroh kawi ka pyrthai.

Na ki ri wa pynmih phniang kawa daw chah ktah dooh toh ka Saudi Arabia kawa phah hadooh 90% i phniang ko lyngba ka Strait of Hormuz wei deiwa dooh syndet ko ya kamwa 80% na iwa jooh ye ko u pynmih daw ye u tkoh syndon ka ri.

Ka UAE leh i jooh, kamwa 72% i phniang ko lai i na kani ka Strait of Hormuz.

Lada jia wa khang ka Iran wow lai ki jhaad, ka Saudi Arabia ye ko wow e jubab deiwa pynyoo dei bor iwa daw pynheh chooh chooh yeiwa da jia kattæ.

Kiwa boon ki ri ym pu em pynbna ki yei pynku dor yei phniang iwa ye u man daw pait chwa ki kammon jia ha kini ki sngi wow wan.