Shillong: Ka khajia hapyrdi ka NPP kawa yahkhmat ya ka sorkar wa ka UDP ka lok bah ka sorkar MDA, da sdang he ko, neibhah wa hadooh katni ka NPP ka kwah ko wow pynyakhun kyrtong ha waroh 25 tylli ki MP Constituency kiwa em ha thaaiñ mihsngi ka ri India.
Hawa pyntikna ya ini, u Montri Rangbah ka jylla uwa man leh u National President ka NPP u Conrad K Sangma da pynkynmoo u wa ka yalang bah ka NPP wa dang dep pynman ha Shillong, da chim ko ya ka rai wow pynyakhun MP ha waroh 25 tylli ki Constituency wa em ha dong mihsngi ka India wa kynthup 14 ngut ha Assam, 2 ha Meghalaya, 2 ha Arunachal Pradesh, 2 ha Tripura, 2 ha Manipur wa mar uwi mar ha Mizoram, Nagaland wa Sikkim.
U Conrad da ong u wa ka Party daw bichaar ko hadien wa yoh ya kiwa thap pyrtuid kiwa kwah wow yakhun MP wei daw chim ya ka rai wa kammon u leh.
Kam wow pynkynmoo wa ka UDP ka da dep ko wow pynbna wei wow tyrwa ya u Dr. Jemino Mawthoh kam u kyrtong cha ka Election MP wow wan na Shillong wei da kyrmen ko wa ka NPP u e ko i kyrchaan deilang wa kiwi ki Party wa emlang ha kani ka sorkar MDA khnang wow em du uwi u kyrtong wa hunlang.
Discussion about this post