U Montri ka chnat Kaam Pohyung yong ka sorkar pyrdi, u Amit Shah ye u wow wan biang cha Shillong ha kini ki kajiak sngi wow wan, wei neiliang ka sorkar daw yaklam biang ko wa oo yow yachem biang wa ki seiñbhalang hajrong ki phang dawa wa kynthup ya ka Inner Line Permit wei wow tipmit noh ya ka ktien Khasi. Ya ini da khana da uwa yahkhmat ka Save Hynniewtrep Mission uwa man leh u President ka Hynniewtrep Youth Council, u Robertjune Kharjahrin.
Hadien wym pu ye u leh iyi iyi da ka sorkar ya ki ar tylli ki phang kiwa da mynjur wa da ka rai (Resolution) hapoh ka Yung Dorbar Chna Aiñ wow pynkrehkaam noh ya ka aiñ yada na ki myndær namo ka Inner Line Permit, ka Meghalaya Residents Safety and Security Amendment Bill, 2020 wa i tipmit ya ka ktien Khasi hapoh ka 8th Schedule yong ka riti synchaar, ka Save Hynniewtrep Mission (SHM) ynne ka sngi da yaklam biang ko wa u Symbood Montri Rangbah, u Prestone Tynsong.
Hawa klam wa ki laad pathai khubor, u Robert da khana u wa neiliang u Symbood Montri Rangbah da pyntip u wa ka sorkar India ym em e ko ya iwon iwon i jubab wa che lada u kyntait lane daw e ko ya ini i dawa, wei da khana u leh wa u Prestone da ong u wa da booddien ka sorkar jylla. Tangwa da ong u wa ki seiñbhalang ki kwah wow yoo yei booddien wa joor yong waroh ki MLA ka jylla.
Uwa yahkhmat ka HYC da khana u leh wa u Symbood Montri Rangbah da pyntip u wa daw wan u Amit Shah cha ka jylla ha ki sngi wow wan, tangwa ka tarik wa i por ym pu tip mynnu, wei da khana chooh chooh u wa ka sorkar MDA daw lai ko wow yaklam biang leh wa u Amit Shah wow dawa ya kini ki phang, heiwa da kular u wa lada u Montri ka sorkar pyrdi u wan u, daw e laad leh ya ki seiñbhalang wow yaklam markhmat hajrong kitai ki ar tylli ki phang.
U Robert da ong u leh wa ki seiñbhalang da dep ki wow klam che ha ka sorkar jylla, wei lada ym pu yoh yei dawa, ki seiñbhalang daw pteiñ bait ki u yakhih wow pynbor ya ka sorkar India u pynmankaam yei dawa pynkrehkaam ya ka ILP wei wow tipmit ya ka ktien Khasi.
