Ka sorkar pyrdi da jubab ko deiwa miat heiyatoh wa i kwah ka jylla ya i Scientific Coal Mining namo wow tih mooyong katkam ka juk Science wei ye ki wow wan cha Meghalaya ha u October, wei ya ini da pyntip ka MLA ka Sutnga-Saipung ka Santa Mary Shylla ynne ka sngi.
Da pyntip ko wa da em ka yalang ha New Delhi wa pynlai da u Rupinder Brar, Additional Secretary, Ministry of Mines ka sorkar India, heiwa da em ki sahep ka Directorate of Mineral Resources, ka sorkar Meghalaya, u Law Secretary, u CVD Diengdoh wa ki heh na ka CMPDIL.
Chooh chooh da ong ko wa ki sahep ka jylla da booddien bha ki yei wow ye u tih mooyong ha Meghalaya heiwa da pynyoo deiwa e da ka Presentation wei ka CMPDIL da batai che ko ya ka East Jaiñtia Hills.
Kamtæ ye ki wow wan ha Meghalaya wow pait kammon i rukom krehkaam ha madan.
Da booddien leh ya ka dorkhat wa e u Chief Minister Conrad K Sangma cha ka sorkar pyrdi.
Ha ka dorkhat da kdaw leh ya ki mat wei da kyrpaad wow pynkhian ya i thaw tih mooyong neibhah wa ka Open-Cast Mining ha Meghalaya ym myntoi ko wow yoh nong ki paidbah.
Deiwa ong wa chah ktah kiwa khayi mooyong ha ka jylla, ka Santa da ong ko wa ka sorkar da kreh chitom ko wow yoh noh u tih mooyong biang kamwa jooh.
Heijooh i por da ong ko wa nadooh u 2019, kani toh ka sien wa nyngkong wa ka sorkar India da rap klam che ko wei u Chief Minister da kreh chitom u miet wa sngi heiyatoh wa ini.
Discussion about this post