Ka sorkar Meghalaya kam chibynta wow pynpoi wei wow pynyoh bordiñ deiwa pynemkaam da i bor ka sngi kamjooh yow pynduna yei pyntngit yaka rymaw hapoh ka jylla, heijooh i por leh yow pyndap yow pynpahooh yei bordiñ. Ynne ka sngi u Montri Rangbah ka jylla u Conrad K Sangma da sdang u ya ka Meghalaya Roof Top Solar Portal kawa pait da ka Meghalaya Energy Corporation Limited (MeECL) ha Shillong, East Khasi Hills District.
Ha kani ka sngi da em leh u Chairman-cum-Managing Director u Arunkumar Kembhavi, IAS wa kiwi ki sahep ka Corporation.
Neiliang u Conrad K. Sangma da ong u wa ka jylla dang em ko iwa jrong i luti wow lai yow pynmih bordiñ na kiwi ki jait ki rukom pynmih bordiñ. Wei ka jylla em ko ka laad wow chim kabu yei bor ka sngi, kamtæ ka sorkar jylla da yooluti ko wow pynheh pynsan ya ini i kaam katwa ye iwa daw yarap kylla wow pynduna yei pynmih yaka CO2.
Da pyntip u leh wa ki bru wa booh yaki Rooftop Solar Panels ym emkaam ki wow pynlut poisa. Daw yoh ki yaka 40% Subsidy naka MNRE, 50% na kiwa pynyoh ya ki Solar Panel wa 10% naka MePDCL. Ki bru won wa booh ya ki Solar Panels daw hap su duna ki T. 2 cha ka MeECL na ka T. 6 chi Unit wa su ki katni. Lada ym em pynemkaam ya i bordiñ naki Solar Panel, daw yoh ki T. 1 chi Unit naka MeECL.
U Conrad da ong u leh wa du na ki Dam Um ym ye wow pyndap yeiwa emkaam ki bru hapoh ka jylla kamtæ emkaam wow thooh laad u pynmih bordiñ na kiwi ki jait.
Ka Meghalaya toh kawa yoh chiboon dooh ka poisa naka Ministry of New Renewable Energy (MNRE) na waroh ki jylla ka North East yow pynmih 70 MW (Megawatt) i bordiñ haka bynta wa nyngkong (First Phase). Hapoh kani ka Scheme, ki bru ye ki wow e wai yei tnoom yung yong ki wei wow dai ya i bordiñ wa tam. Ha ini i rukom, kiwa pynemkaam leh daw man ki kam kiwa dai. Kani ka Scheme daw pynmyntoi ko ya 23,000 tylli ki manyung deiwa yoh 3 Kilowatts kawi ka manyung. Daw pynemkaam leh yaka NET Metering heiwa ya i bordiñ nyngkong u pynemkaam da ki bru katwa kiwa tam daw pynpoi cha ka chnat sorkar.
Yaka yutip wa bniah ye wow lai haka website https://meghsolar.meghalaya.gov.in/.
