U Symbood Montri Rangbah ka jylla uwa pait leh ya ka chnat Bordiñ, u Prestone Tynsong ynne da kular u wa ka sorkar da chim ko ya ki luti wow pdiang ya ki dawa kiwa kreh kam ki Casual Employee wow thung kreh ya ki kam kiwa kreh wa pura katkam ki kyndon ka aiñ.
Da ong u wa i kaam wa yatoh wa i dawa wow thung kreh pura ya ki 1802 ngut kiwa kreh Casual ka MeECL toh iwa kongsan bha wei ym em leh khlot ka sorkar.
Ya ini da ong u hawa jubab yeiwa kylli ha ka Zero Hour wa wanrah da u MLA ka Umroi, u George B Lyngdoh hapoh ka Yung Dorbar Chna Aiñ ynne ka sngi.
U Prestone da ong u leh wa chwa wow pdiang yeiwa dawa emkaam wow bichaar liang wanang nadooh neiliang ka aiñ kamjooh i em poisa ka sorkar.
Kam wow kdaw heini kiwa kreh ka MeECL Progressive Workers Union (MePWU) da jooh dawa ki wow pynskem noh ya ki kam kiwa kreh wa pura ka chnat Bordiñ wei da dawa ki leh wow su noh ya ka poisa (Arrear) wa sahteiñ nadooh u Naichiphaw 2018 hadoooh Thohlakhmi (Feb) 2019. Heiyatoh wa kani ka poisa, u Prestone da ong u wa i su u chong i katkam wa emkaam chwa.
Da khana u leh wa nachwa heipor ka MeSEB da thung ko da kiwa kreh Casual kiwa man kam ki baar jylla ha ki por wa emkaam bru ko.
I kreh toh deiwa thung 60 sngi donhi deiwa e chuti chi sngi wei da pynthymme yei khut kreh na ki por cha ki por katkam wa emkaam.
Nadooh wa wan won da ka MeECL ha ka 01-04-2010, kiwa kreh Casual da pteiñ ki wow kreh wei da su ya ki katkam ka kyndon ka Minimum Wages Act wa kiwi kiwi wei kini kiwa kreh em ki hapoh ki le tyli ki chnat ka MeECL kiwa waroh da em 1802 ngut.
