U MDC ka Saphai Sahsniang Constituency, u Rikut Parieñ ha ka Dorbar Lyiur wa chi sngi ka Council kawa da pynman ha ka 20 tarik, da wanrah u ya ka Motion wow ong wa ki thaw ka Council kamjooh yong ka sorkar jylla toh u man kiwa pynskem wei Register hapoh Council kamwa da lehlang kiwi ki bru samen wa ki kynhun seiñ waphær waphær.
Wei i daw wa wanrah u ya kani ka phang toh wa em i artatien u wa ka Council u Register ko ya ki thaw yong ka wot hawa tip em ko chiboon ki thaw, wei katkam i tip neidaw wym em leh Land Holding næ Register ka Council yei thaw, suki suki wiar chah knieh noh ki.
Sa iwi ong u wa lada ka Council pynskem ko ya ki thaw yong ka, man leh iwa suk ya ka lada pyrkhat ko u leh næ sdang kiwon kiwon ki laad pynmih poisa wa rap heh deiwa ya krehlang wa kiwi.
Neibhah lada chaniah ko du na ka poisa wa mih na ka dan ka Council kam na ki mar pohkhyndaw kam ki Minor wa Major Minerals wa Trading License boi ye ki u wiar hadien, na ini i daw kyntu u wow pyrkhat jngai u chna ki laad pynmih poisa wa neh slem.
U CEM, Thombor Shiwat hawa pynche ong u ki thaw sorkar leh emkaam hi u wan Register ki hapoh ka Council, wei lada toh wow e ka Council yei thaw yong ka cha ka sorkar neibynta iwon iwon iwa mut wa thmu ko, toh u em dei thoh wow yakut yasoi hapyrdi ka Council deilang i dor wa hap su cha ka Council.
Heiyatoh wa ki thaw yong ka Council won pyntip u wa ka EC kawa da man haka 6 tarik u April 2026 da rai ko wa waroh ki thaw ka Council wa em ha East wa West Jaiñtia u pynskem noh ki lada toh ki wow hap leh da ka Land Holding namo u Register hapoh ka chnat Forest.
Hawa pynche yei yukylli wa da booh u Jamshaphrang Pohtam yei bakla heiyatoh wa i mih kulmar nei kamtre ya ki thaw da ar le ngut ki bru, kamjooh i ya khajia kyntoor pood, u CEM ong u ymtoh i bakla naka Council neibhah ka Council pdiang ko ya iwon iwon wa da e mynjur u Dolloi yow pynskem ya kawon kawon ka thaw.
Wei hawa em kam ini i jia næ i ujor ym em de pynlait ya ki kot ki sla hadooh wow ye pynbait deiwa khut ya ki Dolloi kamjooh kiwa wan ujor wa kiwa mut Register.
U CEM pdiang u leh boi ye u em i bakla na ki por warim heiyatoh i rukom Survey ya ki thaw wa jooh pynemkaam u thaw da u tylle donhi, weiwa boi ki tre thaw leh kdaw hi-eh ya u pood tæ mih i yakam pood kylliang wei arwi awra.
Na kini ki daw wa ka EC leh da chem ko boonjait i jia wa kam kini, kamwa man katte ya ka Survey da leh noh katkam wa yah ka juk stat thymme deiwa pynemkam GPS heiwa ya ka thaw wa dadep leh Land Holding ym ye de u leh arsien.
Pyntikna u leh wym jia de neini chakhmat neibhah ya kiwa kreh ya kani ka bynta leh dadep e sikai wow leh ki katkam wa emkaam i por.
Discussion about this post