Yieñ klam u Nujorki yei eh wa maad kiwa chong chnong ka Block-I, sñiawkhia u yei mih ka seiñ UPKLF

U MLA ka Mowkaiaw, u Nujorki Sungoh ynne hapoh ka yung dorbar chna aiñ da wanrah u ya ka phang yaklam neibynta kiwa boon ki kaam wa ktah ya kiwa chong chnong ka Block-I khamtam hadien wa mih ka seiñ kieñ suloi wa thymme ki Karbi wa tip kam ka United People’s Front of Karbi Longri (UPFKL) heiwa da yoh leh wow kem da ki pulit ka Assam ya ar ngut ki dkhot kani ka seiñ deilang wa tiar yaleh wa kynthup ya ka Pistol wa ki Grenade wei da chem leh na kini wa ki chithi dawa poisa.

U Nujorki da ong u wa kani ka seiñ toh ka wow pynsier mynsien ya ki Pnar wa em ha Block-I iwa da man leh i buit ki Karbi nadooh nachwa deiwa pynkynmoo yeiwa jia ha u snem 2003 heiwa 5000 ngut ki Pnar da hap yut chnong ki cha Sahsniang. Hanla kattæ leh kini ki bru wot hadien wa da chah phiah ki nadooh i por wa em du ka jylla Assam, dang yooluti bait ki hadooh katni wow em chapoh ka Meghalaya.

Da kyntu u leh ya ka sorkar wow pynchna ya u sarok Khatkasla-Moojem-Jrikyndeng neibhah du uni u sarok u wym lai luti na ki chnong ki Karbi wei daw yarap ya ki paidbah lada mih iwon iwon i kynyaad yow lai ki dei suk dei saaiñ.

Heiyatoh wa i chait i khiah da ong u wa da emkaam wow booh PHC ha Psiar næ ha Mooluber neibhah ki chnong kam na Mowjem, Lamarang, Chnong Thymme da hap ki wow lai 25 Km cha Sahsniang PHC. Da ong u leh wa ye ka sorkar wow pynku kyrdan ya ka Sub Centre wa em ha Psiar cha ka PHC.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Hawa e yei jubab, neiliang u Montri Rangbah ka jylla, u Conrad Sangma da ong u wa ka sorkar ym em kheiñstiñ ko yei mih ka seiñ UPFKL wei da pynboon leh ya ki pulit ha Saitsama Outpost da em leh ki Special Force ha Nartiang wei da leh yeini hadien wa yoo yei mih khubor wei hadien wa yoh chithi na ka seiñ JSM hajrong ini tangwa ym em won da yoh da ka FIR næ kawon kawon ka ujor wa em ki bru wa da chah dawa poisa ha kani ka seiñ.

Heiyatoh won wa u sarok, da pyntip u wa ka sorkar dang pynkhreh ko yaka DPR wei u chna ya u sarok ha ki thaw wym em ya kajia pood wei ka sorkar leh da chimkhia ko wow yaklam wa ka sorkar Assam kamjooh waka KAAC yow pynbait noh ya ini i kaam.

U Montri Rangbah da yaroh u leh ya u Nujorki uwa em yei kitkhlieh ya kani ka thaaiñ heiwa da wan yah u ya kiwa boon kiwa chong chnong yow yaklam wa oo heiyatoh wa ini kaam.