Ka Wahiajer Narpuh Social & Sport Club (WNSSC) da pynche ko yei pynche paidbah u Waheh Chnong ka Wahiajer Narpuh, u Sibren Sumer yei e NOC wow pynheh yei pynmih khyndaw-bilat wa Clinker yong ka Meghalaya Cement Ltd wa kiwi de iwa emkaam kani ka karkhana chna u tei thymme.
Ka Club da ong ko hao wa kani ka Company toh kawa emkaam u yoh bor na ki le chnong kitæ ka Wahiajer, Chiehruphi wa Thangskai wei da chna leh ya ka Synjuk kini ki le chnong wow pait yeini.
Tangwa ha dorbar ki le chnong wa da pynman ha ka 04-03-2022 ha Thangskai Community Hall, ha katai ka dorbar ym em chim rai wow e NOC yow kyrchaan yei thmu pynheh ka MCL ya ka karkhana.
“Hadien won u Chairman yong ka le chnong u Iaidlang Bamon da pyntip u cha i wa ka Executive Committee da pynbait ko wow e kti wei wow pynman dorbar ha jar jiar ki chnong yow yaklam neibynta ini i paan NOC daka Meghalaya Cement Ltd.”
“I kam kiwa chong chnong ym em yoh i ya katæ ka dorbar wow yaklam neibynta i e NOC wei ya ini i e bor namo ka NOC da e samen da u Waheh Chnong, u Sibren Sumer wei hadien wa tip i yeini i e NOC yong u waheh chnong, i neiliang ka Wahiajer Narpuh da lai ujor i cha u Secretary ka Synjuk ki Le Chnong, u Khangbor Rymbai haka 26-07-22.”
“I neiliang kiwa chong chnong dang mut i wa i pyndooh ya kani ka NOC tangwa da tip wym em pyndooh du hadien wa mih khubor wow pynman ya ka Public Hearing.”
Ka Wyrta na u Lami Mukhim, President wa u Cheerful Surong, Secretary ka Wahiajer Narpuh Social & Sport Club.
Puræ leh: Pynche u Waheh Chnong ka Wahiajer Narpuh yeiwa pynbaad e NOC pynman Public Hearing ka MCL
Discussion about this post