Ka High Court ka Bangladesh ynne da kyntait ko wow e jamin ya u Hindu uwa tip kam u Chandan Kumar Dhar uwa khut sin leh kam u Chinmoy Krishna Das Brahmachari uwa man leh kam uwa yahkhmat warim ka ISKCON heiyatoh wa ka mukotduma pynyap bru namo ka Murder Case.
Kani ka Case toh kawa da em ha Chattogram Kotwali Police Station wei ini toh yei chah pam hadooh wa yap uwi u muktiar uwa tip kam u Saiful Islam Alif iwa da jia ha ka 26-11-24 hei kynaad wa da jia hajan ka Chattogram Court Building.
Ka miej bichaar u Justice KM Zahid Sarwar wa u Justice Sheikh Abu Taher da kyntait ki yei dawa pynyoh jamin neidaw wa dang bichaar da ki yung bichaar wa em ha wah kiwa dang chim yeiwa khana kiwa sakhi, da pyntip u muktiar u Chinmoy, u Apurba Kumar Bhattacharya.
Da ong u wa ka High Court da booh tarik ko ynne ka sngi yow ap u sñiaw ya i dawa pynyoh jamin kiwa da yaleh u Chinmoy heiyatoh wa ki soo tylli ki mukotduma.
U Chinmoy toh uwa da em hapoh patok nadooh u 25-11-24 tangwa u muktiar u da paan jamin deiwa e daw toh wa kjut wei chitom u kattæ.
Chwa ini nadooh ki Deputy Attorney General leh da pyrchah ki yeini i paan jamin.
U Chinmoy toh uwa da chah pynngat ha ki 8 tylli ki mukotduma kiwa yatoh nadooh ki kaam pynyap bru wa ki kaam pyrchah ri.
Dadep u leh wow yoh jamin heiyatoh wa ki le tylli ki mukotduma wa da e da ka High Court heiyatoh wa ki mukotduma wa em ha ki yung bichaar kiwa ha wah tangwa ka Supreme Court da pyndam ko ya kani ka hukum wow e jamin.
Discussion about this post