I mih ki liang wow pyrchah yei pynman ka sorkar jylla ya ka Cherry Blossom ha ka sngi Bibar namo ka sngi Sunday da pteiñ biang wei ha kani ka kynti wown da mih da ka Joint Action Committee (JAC), yow pynbor ya ka sorkar wow kyrriah noh ya ka sngi pynkut yong kani kawa daw pynman ha ka 19 tarik kawa man ka sngi Sunday.
Kani ka JAC da dawa ko na u Montri ka chnat Tourism, u Paul Lyngdoh wow kyrriah noh ya ka sngi pynkut kani ka tamasa, wei da pyrchang ki leh wow lai yachem wa u Montri tangwa da kyntait u wow e por yow yachem.
Hawa klam wa kiwa thoh khubor, u President ka RBYO, u B.G. Lapang da khana u wa neiliang ka JAC ym chong ngiah ko wow yaleh katwa ye yow pyntikna wa ka sorkar ym ye ko wow pynman ya ka Cherry Blossom Festival ha ka sngi Sunday.
U Lapang da ong u wa ki paidbah ym pyrchah ki ya ka tamasa tangwa ym sñiaw yahaap wow pynman ha ka sngi Sunday kawa man ka sngi wa kyrpang ki paidbah ka thaaiñ khamtam ki Christan.
Da pynbaad u leh wa ka sorkar ym em kynjoh ktien ko ya ki bor chnong hachwa wow pynman ya ka Cherry Blossom Festival haka Sunday ha Madan Kurkalang, Ri-Bhoi District.
Neiliang uwi na ki khynroo ka chnong Bhoirymbong, Lumdaitkhla, u Tyngshaiñ Makri leh da pynsñiaw u wa ym em pyrchah ki ya ka tamasa tangwa ym kwah ki wow pynman ha ka sngi Sunday.
Discussion about this post