Ym bien u yaklam wa u bru wa pynyachoon jaitbru, mih ka VPP hawa e jubab u Rakkam

U MLA ka Nongkrem, u Ardent M Basaiawmoit ynne da yah u ya ki MLA ka VPP wow mih noh ki napoh ka yung dorbar hadien wa chah u Deputy Speaker, u Timothy Shira wow jubab u Montri ka chnat puræ puthi, u Rakkam A Sangma ya ka phang wa da wanrah u Ardent hi heiyatoh wa i thung kreh ya kiwa sikai skur ha Dadengree Sub-Division.

Hachwa wow wanrah ya kani ka phang, u Ardent da ong u wa kwah u wow jubab yeini da u Montri Rangbah næ da ki Symbood Montri Rangbah neibhah wym kwah u wow yaklam wa u Rakkam uwa man kam uwa pynyachoon jaitbru, uwa kwah wow pynman thma wei pynmih umsnaam hapyrdi ki Khasi wa ki Garo.

Da pynkynmoo u wa ka VPP dadep ko wow e FIR pyrchah ya u Rakkam yeiwa klam u heipor wa yalap Election MP ini wa dep wei ki kyntien wa klam u toh kiwa pyrchah ya ka VPP wei kiwa pynyaphær jaitbru.

Da ong u leh wa ka sorkar ymtoh u tuklar ko hawa takit ya ini i kaam wei ini wa klam u Rakkam man ko pyrchah ya ka kyndon 190 ka BNS.

Related posts

Da 4 lak tam ki Vote jop ka Priyanka Gandhi ha ka Election wa nyngkong yong ka

November 23, 2024

Ym du ha Garo tangwa ka Meghalaya waroh da yoo yei kylla hapoh ka NPP, ong ka MLA wa thymme ka Gambegre

November 23, 2024

U Symbood Montri Rangbah, u Prestone Tynsong da ong u wa hawa dadep wow e FIR toh u e u lai ko chakhmat wei ymtoh wow rah yeini hapoh ka yung dorbar wei ka yung dorbar toh u krehkaam ko katkam ki kyndon wa toh u leh ko wei ymtoh leh wow wanrah ya ki kaam yong samen hapoh ka yung dorbar.

Neiliang u Deputy Speaker da ong u wa katkam ka rukom manda kylli hapoh ka yung dorbar, u Montri wa pait ya katu ka chnat toh u jubab u, kamtæ da e laad u ya u Rakkam wow e u yei jubab.

Ha ini i por ki MLA ka VPP da mih ki napoh ka yung bichaar wei u Rakkam da sdang u yei klam deiwa ong wa i kam ki bru wa da biang i stat i tip ym jooh yachoh i wei tip i wow burom.