Ka Dorbar Chnong Barato dei ya krehlang waka VDP Chnong da pynbna ki wa neidaw wa em ka yaseiñ Synod Rangbah kawa 20 yong ka KJP Synod Mihngi kawa daw pynman hapoh ka chnong ha ki soo sngi nadooh ka 17, 18, 19 wa 20 tarik uni u bnai. Kamtæ da maham wei da khang pyrchah ya kiwa dai kiad wym toh u dai kiad ki hapoh kini ki soo sngi khnang wym mih iwon iwon i kulmar wei ym pynthut ya kiwa wan yaseiñ.
Hawa yatoh wa kiwa dai dukan marbaam wa kiwi kiwi, ym chah wow dai ha ki luti syngkieñ khnang wym pynthut yei lai i wan ki paidbah wa ki kari ki motor.
Ha ka Sngi U Blai (20-03-22) da khang wow dai ya iwon iwon ha ki luti wow lai cha ka thaw wa pynman yaseiñ lane ha ki thaw wa pynyieñ kari wa ha ki thaw wa chong yaseiñ, tangwa u e laad wow chongdai nadooh dong Lumiaw (Barato C) cha wah wei ini leh u chah u dai du ha ki dukan chnong wa cha jngai na u sarok yow lait u khang luti yei lai i wan.
Da pynbait leh wa ha ka Sngi U Blai ym chah ya ki kari kiwa lai luti wow lai ki lyngba u sarok Barato chadooh Laskein lane Thangrain Shilliang Myntang hapoh i por 12:00 waje pyrdi sngi lait noh du kiwa kjut wa chitom, kiwa lai yaseiñ wa ki bru sorkar.
Kiwon kiwon kiwa leh pyrchah daw pynchitom katkam ki aiñ chnong.
Da kyrpaad ya ki khon yong ka chnong wow ya krehlang wa ka chnong khnang yow wanrah ya i bha i miat heiwa kani ka yaseiñ paidbah u man ko kawa jop.
Ka wyrta na u Nihun Sten, Waheh Chnong ka chong Barato.
