Ka JNC-Western Zone hapoh i yahkhmat u President yong ka, u Hamehi Bamon chirup wa ki kyrtong wa thoh Exam wa pynman da ka DSC ka West Jaiñtia Hills District ha i kreh Lower Division Assistant (Typist), hadien wa da pynbna ha ka 15-06-2026 ya ki Roll No kiwa yoh u chimbynta ha ka Interview, ki kyrtong wa leh ya ka Subject Local Language dap ki de sñiawdiaw neidaw wym em biang kani ka rukom pynlai ya kani ka Exam.
Ha ka 17 tarik uni u bnai da lai yachem ki wa u DC wei da e leh wa ka dorkhat wow kylli na oo weileh ya ka Result ka Typing Test da pynmih ha ka 07-05-2026 katwa ya ka Local Language wym em u pynmih Result heiwa da pynmih du ki Roll No donhi kiwa yoh u psiah cha ka Interview, heiwa da pynbaad wa kani man ko kawa em iyi iyi cha lyndet hajrong i wym em u khooid i rukom khut Exam da ka DSC ka West Jaiñtia Hills District neibhah ki kyrtong wa yaleh Exam Local Language da ong ki wa boon bha kiwa Pass tangwa ka Result won wym em u pynmih ya ka.
Da kylli leh na u DC neiwon yoh ya kani ka aiñ wow leh kamni heiwa da jubab wa ini toh na ka Committee yong ki hi.
Ka JNC wa ki kyrtong da dawa ki wa kat wym pu che bha ha ki kyrtong yei wym pynmih ya ka Result waroh neibynta ka Local Launguage, ym e laad ki wow khut Interview neibhah da em bait iyi iyi cha lyndet.
Ka JNC da khyrngiat ko leh yei wym jooh em u leh ki ya ka Local Language tangwa ha uni u snem da leh ki, wei u President ka seiñ da ong u ini i rukom thung kreh hapoh West Jaiñtia Hills District deiwa pynleh ya ka Local Language toh u man da ka ktien Pnar tangwa kat wow pynleh ki ya ka Exam ki kyrtong da pynleh ki dei ktien Khasi wym toh dei Local Language næ i ktien Pnar wei yeini ka JNC da pyrchah joor bha ko ya ka DSC.
Kamjooh leh da ong ko wa lada ym pynche ki ya i rukom leh ya ka Local Launguage wei lada ym pynmih smat ya ka Result wa pynyoo wa ki Marks wa yoh ki kyrtong waroh, ka seiñ leh ym ngait ko u khut ya ka Interview.
Discussion about this post