U Symbood Montri Rangbah ka jylla uwa pait leh ya ka chnat Bordiñ, u Prestone Tynsong da ong u wa ym toh u khuslai kiwa kreh ka MeECL hajrong i wanrah ya ka Electricity (Amendment) Bill, 2022 hapoh Parliament neibhah da tieñ ki wa daw e kti noh ya ka kaam pynmih bordiñ ha ki kti ki bru samen.
“Hanlada ini i pynkylla ya ka aiñ mankaam i, daw chong ko khaddooh ha kti kiwa pynpoi bordiñ ki jylla namo ki DISCOM wei ha khaddooh daw poi ko ha kti ka sorkar hi,” da ong u Prestone.
Ki wakreh ka MeECL ha ka 8 tarik da ya ksohktilang ki wa kiwi hapoh ka ri kiwa da yakhih pyrchah yei wanrah ya kani ka Electricity (Amendment) Bill, 2022 hapoh Parliament.
Hajrong ini u Prestone da ong u wa ym toh u sñiawthooh bakla wei ya ka ri dang yabhah hi hapyrdi ki jylla wei ym ye wow thombor yei bor ki sorkar jylla.
Chooh chooh da ong u wa ki Company toh kiwa da mantre da ki sorkar jylla wei iyi i daw u e kti ha ki bru samen wow leh yeini i kaam wei lada pyrchang wow leh yeini, ki sorkar jylla ye ki wow pynsangeh yeini.
Ki wakreh ka MeECL hapoh ka lama ka Coordination Committee of Registered MeECL (Employees’) Associations and Unions (CCORMAU) da pynman yakhih ki hakhmat ka yung krehkaam ka MeECL wa em ha Lum Jingshai, Shillong heiwa da ong wa kani ka Electricity (Amendment) Bill, 2022 daw ktah ko ya ki jylla wa khian kam ka yong i ka Meghalaya.
