Shillong: U Chief Executive Member ka Khasi Hills Autonomous District Council (KHADC), u Titosstarwell Chyne da klam che kdar u ha ka dorbar wa ynne ka sngi wa ka Council ym e NOC ko wow tih Uranium, deiwa ong leh wa ka KHADC daw thoh ko cha ka sorkar jylla yow pynsmat yei lai pait lai sylli da ki stat thooh bniah wei wow phah lang leh ya ka bui (Report) cha ka Council.
U CEM da ong u ya ini hawa klam ha ka kynta kyrpang hapoh ka dorbar wa da wanrah da u MDC ka Malki-Laitumkhrah, u Fantin J Lakadong yow tip ya ki luti yong ka KHADC hawa yatoh wa i mih khubor wa em i pai yong ki top pynlang jhep Uranium ha ka thaaiñ Nongbah Jynrin, South West Khasi Hills.
Ha kani ka yatai da chimbynta lang leh da u MDC na Mawkyrwat u Carnes Sohshang, MDC ka Mawkhar-Pynthorumkhrah u P N Syiem, MDC ka Nongkrem u Lambor Malngiang, u MDC wa dei thung u Bindo M Lanong wa u MDC ka Shella u Teinwell Dkhar.
U Titos da ong wa ha ka 22 tarik u Thohlakhmi (Feb), 2018 da mynjur da ka dorbar wa waroh ki phang wa yatoh wow tih Uranium; ka EC ym ye ko wow rai samen khlem da tip da ka yung dorbar. Da ong u wa kani ka Executive Committee da dep ko u chong pyrkhat wei da rai wow yang yaka ya ka Report na ka sorkar jylla kawa da thung ya ki bru wa stat ki wow thooh bniah wei wow sylli ya ki thaw wa em u Uranium.
Da ong u wa ka KHADC ym chah ko la kammon kammon leh wow tih ya utai u marpoh khyndaw ha ki thaw ka Council, wei pynsñiaw u leh wa ka Executive Committee daw thung ko leh ya kawi ka kynhun yong ki MDC na waroh ki seiñ saiñpyrthai yow lai pait ya katai ka thaw.