Hadien wa mih ha ka kotkhubor pharæng wa da kam wa ka sorkar pyrdi da pyndooh noh ko ya ka Scheme Jal Jeevan Mission (JJM) hapoh ka jylla Meghalaya, hajrong i chah pynbaad wa em i pynkrehkaam bakla. U Montri wa pait ya ka chnat Public Health Engineering (PHE), u Renikton Lyngdoh Tongkhar da ong u wa katai ka khubor toh du wow yahbkla wei ym em iyi iyi wa sakhiat.
U Montri da pyntip u wa ka chnat PHE næ ka Ministry of Jal Shakti yong ka sorkar pyrdi leh ym tip ki iyi iyi ya kani ka khubor. Da ong u wa ka sorkar jylla hadooh katni ym em yoh ko ya kawon kawon ka chithi wow pynsangeh ya ka JJM, deiwa pynrap wa lada ka Ministry thmu ko wow pynsangeh neidaw wa pynkrehkaam bakla, toh u paan pynche chwa na ka sorkar jylla hachwa wow chim rai, tangwa kamwa man katni ym em kam itæ.
Da pyntip u wa hadien wa da mih kani ka khubor wot ki Contractor wa pynkreh ya ka JJM ha kylleiñ ki District ka jylla da tieñ ki wow kreh ya i kaam ya ym yoh poisa ki, wei neiliang u Renik da kyntu u ya ki laad pathai khubor wow thooh chwa yei sakhiat yow lait nei yah bakla ya ki paidbah. Da ong chooh chooh u wa lada ki wakreh yong ka kotkhubor wa da pynmih ya itai i thoh lada em ki yei sabut wow sñiawbha ki wow pyntip lane khana lang cha ka chnat.
U Montri da pyntip u leh wa i pynkreh ya ka JJM ha ka jylla ym toh kawa da lai ware chakhmat wei ym toh leh kawa cha tre, tangwa i pynkreh ya ka JJM da lai bait wei smat kamwa da booh thong, heiwa da pyntip wa hawa sdang em ki kamwa 4500 tylli ki manyung kiwa da yoh ya ka umkor, wei hadooh katni em kamwa 1,98,000 tylli ki manyung kiwa da yoh ia ki umkor hadooh ha yung.
Hawa kylli, u Renik da pyntip u wa i mang poisa na ka JJM ya ka Meghalaya man ko hapyrdi T. 2,800-3000 klur, deiwa pyntip leh wa katai ka poisa wa da mang ym ye wow pynlai cha kiwi won ki kaam namo ki Project.
