U President ka Meghalaya Pradesh Congress Party, u Vincent H Pala da ong u wa uwa yahkhmat ka Congress Legislature Party, u Dr. Mukul Sangma ym em daw u iyi iyi ya oo kam u President, heiwa da yaklam u leh ynne ka sngi ha i yachem ha ka Pradesh Election Committee.
Hawa klam wa ki laad pathai khubor, u Pala da pyntip u wa ha i yaklam wa u Dr. Mukul, ym em daw u iyi iyi ya oo, tangwa iyi wa u Dr. Mukul da pynsñiaw u toh i wym sñiawsuk ya i rukom leh yong kiwa yahkhmat ka AICC (All India Congress Committee) kiwa da lai lait ya oo khlem da ya syllok hawa chim ya ki rai neibynta ka Party ha ka jylla.
Hajrong i mih ki khubor kynrum kynram ha ka Party khamtam wa ynnin ka sngi kawa kdaw wa u Dr. Mukul da sdang u wow khroh ya ki para MLA wow mih noh na ka Congress, u Pala da pyntip u wa neilliang kiwa yahkhmat ka AICC ki da kylli ki hajrong i long i man ka Party ha ka jylla, tangwa hadooh katni ym em paan ya kawon kawon ka Report.
U Pala da ong u wa ka Congress toh ka yung ka sem kawa heh, wei i duna heini heitai em ki malu mala, neibhah ka Congress man ko kam ka skur neibynta kiwa yahkhmat saiñpyrthai, deiwa pynrap wa ki bru kiwa em katni ha ka sorkar MDA leh toh kiwa da Pass na ka Congress, wei kamjooh hapoh ka ri India kamwa 30% toh kiwa yahkhmat kiwa da mih na ka Congress. Da ong u wa ym em i yapra tangwa du i ya ngiat wa i yataan markylliang kamwa jooh man ha kiwi ki jaitkaam.
