Shillong: Ka sorkar ynne ka sngi da klam che wa ym ye ko wow kohngooh ya i dawa yong ki seiñ na East Jaiñtia Hills, kiwa pyrchah ya i rai yong ka sorkar wow pynpoi mooyong na Assam cha ki karkhana pynmih khyndaw-bilat.
U Symbood Montri Rangbah ka jylla, u Prestone Tynsong hawa klam ynne ka sngi da ong u wa kiwa khayi mooyong na kani ka jylla toh u sñiawthooh ki wa ini ym toh ha kti ka sorkar wow pynlait ya u mooyong haka jylla, hanla ka NGT da e laad ko wow challan 2 lak metric ton u mooyong, neibhah ya kani ka kaam da ekti wow lilam da ka Coal India Limited.
Da ong u kamwa man kattæ ym pu lait na i chah khang ha ka NGT, wei khlem ki mar wa emkaam ki karkhana chna khyndaw-bilat ym ye ki wow krehkaam, wei ka sorkar ym yohsa ko wow pynpoi ya u mooyong na baar.
Da ong u wa ka Supreme Court da e bor ko yaka jylla Meghalaya wow challan 22 lak metric ton u mooyong, wei ya kani ka kaam leh hap leh da ka Coal India Limited, kawa dang dep ko leh wow pynbiang ya kiwa emkaam, katwa na ka NGT da e bor ko du 2 lak metric ton. Da ong u wa kani ka kaam wow pynlait ya u mooyong ha ka jylla dang lai ko hadooh kattæ wei lada lait, kini ki karkhana daw thied bait ki da u mooyong uwa na kani ka jylla.
Hawa kylli, u Prestone da pyntip u wa kiwa yah truck daw hap ki wow bood thij pa thij yaki kyndon wa da booh da ka sorkar yow lait na i maa na ka khlam COVID-19, da pyntip chooh chooh wa ki karkhana pynmih khyndaw-bilat leh da bood ki ya iwa phah ka sorkar, heiwa da booh yaki thaw siat dawai ha ki khyrdop wow pynsum ya ki truck ha i por wa psiah wa mih ki.
Discussion about this post