U MLA ka Rangsakona, u Zenith Sangma uwa man leh u Vice President ka All India Trinamool Congress (AITC) Meghalaya Unit da ong wa ka Meghalaya Democratic Alliance (MDA) ka sorkar wa yahkhmat da u Conrad K Sangma ym em hok de ko wow synchaar ya ka jylla neibhah wa em du ka sorkar tangwa i synchaar won ym em.
U Zenith da pynbaad u wa ya ka jylla Meghalaya kawa miat bha da lute na waroh ki liang wei ini toh i chet kylla ya ki paidbah wei da ong u leh wa ya kani ka phang da dep u wow klam nadooh u snem 2019, tangwa kani ka sorkar barabor da kyntait bait ko. Da ong u leh wa i sakhiat hi toh wa ya ini i baam tooh da leh deiwa tip lang da ki bru wa em hei bor.
Da ong u wa i oor i khlieh tnoom (Dome) ka yung dorbar chna aiñ wa thymme ka jylla kawa dang pynkreh katni toh i bakla joor ha i liang ka ‘Technical’ wei da pynbaad u leh wa ini toh i kaam damok. U Zenith da ong u wa lada i jia iwa jia heipor sngi, da em bait i dooh i mynsien bru wei u jia iyi lada ini i jia da jia leh heipor wa ki 60 ngut kiwa mihkhmat dang chong hapoh yung dorbar.
Chooh chooh uni uwa yahkhmat ka AITC da pynbaad u leh wa ini i jia toh iwa pynyoo yei baam tooh, wei iwa ye u mutdur leh wa hadooh katwon i baam toh da psiah i ha ki bru kiwa em hei bor wa hadooh wym em de i sñiaw næ i kitkhlieh neibynta i chngaaiñ yong kiwa yahkhmat ka jylla wa kynthup leh ya ki, tangwa neidaw wa em i kwah wow pyndap ya idæ. Kamtæ hajrong ini iyi iyi waroh, toh wow takit deiwa paka neibynta wow pynchitom katkam ka aiñ ya kiwa emkti, da ong u Zenith.
Da ong u leh wa ha iwi i jingjia won ka MeECL da emkti ki wow pynman ya ki bru wow dooh yei mynsien itæ deiwa thung ya ki bru kiwa khlem da yoh yei sikai wow kreh yei kaam wei ini da wanrah yei yap chah riñ hei bordiñ wei ini da yoo yeiwa jia ha ka 21 tarik uni u bnai, heiwa uwi u bru da dooh noh u yei mynsien iwa da pynman ya ka kurim wa ki khon wa dang khian wow ngat ki yei chitom wa da dooh ya uwa kamai.
“I beiñ joor i yei leh wym khlem da pyrkhat yong ki bor pynlai ka MeECL ki wym em kitkhlieh wei toh leh u em ka takit wow e yei bichaar wa hok cha kitu kiwa ngat ha ini i pap,” da ong u Zenith.
