Shillong: U MLA ka Congress na Mawlai u Process T Sawkmie ynne ka sngi haka dorbar ka Meghalaya Legislative Assembly da ong u wa da em i khuslai haki tre chnong ka jylla wa lada ka Article 370 ye wow pyndooh yaka na Jammu and Kashmir, ka Article 244 leh deiwa suk u ye u pyndooh yaka na Meghalaya.
Ka Article 244 (2) ka Constitution ka India da booh ko yaki kyndon wow em ka Sixth Schedule ha ki thaw wa em ki jaitbru ri-loom ha Assam, Meghalaya, Tripura wa Mizoram.
“Lada jia ini, i daw dooh i yei man ST wei daw dooh leh yaka aiñ Land Transfer Act,” da ong u Sawkmie hawa klam hajrong wa mih khubor yei wa lai pynman pyrchah ki kattu katni ki seiñ hakhmat ka Meghalaya House, Kolkata ini wa dep.
U MLA ka Congress da ong u wa ki bru ka Meghalaya kwah ki wow phah yaka khubor wa che cha Delhi wa ki bru ka jylla ngait ki haka Constitution wei kwah ki wa ka India u roi u paar ko.
U Sawkmie da ong u leh wa kitu kiwa pynman yei pyrchah ha Meghalaya House Kolkata toh iwa leh da ki bru wa em yei thmu cha lyndet.
Chooh chooh da ong u wa ki le ngut ki bru kiwa yachem wa u Lat ka jylla u Satya Pal Malik kiwa kam wa em i leh pyrchah yaki baar jylla ha Ichamati, East Khasi Hills toh kiwa em leh yei thmu wa murieh ki.
U Montri Rangbah ka jylla u Conrad K Sangma da ong u wa kiwa wan wow pyrchah hakhmat ka Meghalaya House da beiñ ki ya iwa kam ki toh wa em i chah lehbeiñ ki khian paaid hapoh ka jylla ha thaaiñ Ichamati wa Bholaganj.
Da pyntip u leh wa ki pulit ka West Bengal ym em chah ki ya kini ki bru wow psiah ki chapoh.
U Conrad da ong u leh wa ini i jia toh neidaw iwa jia ha Ichamati haka 28 tarik u Thohlakhmi ha uni u snem heiwa da mih i ya kynaad hapyrdi ki dkhot ka Khasi Students Union (KSU) wa ki wym toh ki jaitbru ri-loom ha Ichamati heiwa da mih i mynsoo wei da khlaad noh u Lurshai Hynniewta (35 snem) uwa chong chnong ka Khliehshnong, Sohra.
Heiyatoh wa ini, u Montri Rangbah ka jylla da pyntip u wa da kem 24 ngut ki bru wei da Charge Sheet yaki 70 ngut ki bru.
Na ini iwa jia, da poi cha i chah dung ki bru ha Iewduh wei da dooh yei mynsien yong uwi u bru. Heiyatoh wa ini, da kem ya arngut ki bru wei da dep leh wow Charge Sheet.
“Deiwa leh smat ya iwa emkaam da ye wow pynjai jai ha lchamati, Shillong wa ki thaw wa cha jan,”da ong u Conrad.
U Montri Rangbah da ong u wa hadien wa jia ini waroh da em kiwa da li e ya kiwa boon ki dorkhat kiwa da thoh cha u Prime Minister ka India, u Lat ka jylla, u Montri Rangbah ka Meghalaya heiyatoh iwa maad ki Bengali ha Ichamati wa Bholaganj wa kiwi ki thaw ha Meghalaya.
U Sangma da pyntip u leh wa da em ka takit hadien wa phah ka National Commission tor Protection of Child Rights (NCPCR) New Delhi heiwa kani ka Commission da sñiawkhia ko ya iwa pynbaad wa em i chah lehbeiñ ki kynthai wa ki khynnah ha Ichamati wa kiwi ki thaw wa em ha East Khasi Hills District.
Ka pyntip u leh wa ka Deputy Commissioner ka East Khasi Hills da hukum ko yaka District Child Protection Committee wow pynman yaka takit heiwa da e laad ya kiwa chong chnong wow khana ki ya iwa kam ki heiyatoh wa chah lehbeiñ wei yaka Report da phah cha NCPCR New Delhi.
Chooh chooh da pyntip u wa katkam wa chem, ym em i chah lehbeiñ kiwa chong chnong ka lchamati, khamtam ki kynthai wa ki khynnah, wei em hi i chitom ha i khih i khan kiwa chong chnong neidaw ka khlam COVID-19 wei neidaw wa ym em pynthymme yaki Trading License daka KHADC.
“Ka Deputy Commissioner, East Khasi Hills deilang waka District Council Affairs Department da chim ki ya kani ka kaam wa yatoh wa i pynthymme yaki Trading License waka Khasi Hills Autonomous District Council (KHADC).”
