U Montri ka chnat Bordiñ ka jylla, u James PK Sangma ynne ka sngi da ong u wa ym sñiawphær u yei dawa hiar chuki ya oo kam u montri ka chnat neibhah kiwa dawa em ki i sñiawkhia neibynta ki paidbah.
Kam wow pynkynmoo heini, ka United Democratic Party (UDP) lyngba ka chithi wa da soi da u General Secretary yong ka, u Dr. Jemino Mawthoh, ha u bnai wa dadep da dawa ki na u Montri Rangbah wow pyndooh noh ya u James ya ka chuki ka chnat hajrong i wymye wow pynbait ya i eh i khoo khamtam hajrong i chah pyndooh bordiñ.
U James da ong u wa kam u Montri hawa chimkti u ya i kaam, hap em u i kitkhlieh, wei sñiawthooh u wa i dawa mih i nei sñiawkhia ya ki paidbah, deiwa pynrap wa ym em u wow ong iwon iwon pyrchah ya ki bru wa dawa hiar chuki ya oo.
Da ong u leh wa kam ka kynhun sorkar, ka yaleh ko wow pynbait yeiwa wit ha ka chnat deiwa pynrap wa i eh i khoo toh iwa da slem wei lada toh u chimkti da kiwi leh ya ka chuki ymye u pynbait waroh wei daw mih hi i eh i khoo.
U James da ong u leh wa sñiawburom u ya ki bru kiwa sñiawthooh yei sakhiat wa ini i eh toh iwa da slem, wei dang chimpor wow pynbait tangwa daw man i neibynta i bha hi.
