Ka Montri ka chnat i chait i khiah, ka Dr. Ampareen Lyngdoh hawa jubab yeiwa kylli u MLA ka Mowkaiaw, u Nujorki Sungoh ynne ka sngi hapoh ka dorbar chna aiñ, da ong ko wa kamwa man kattæ ym em thmu ka sorkar wow wanrah yaka Medical College ha Jaiñtia Hills.
Da ong ko em ki kyndon wa rkhiñ wa da booh da ka sorkar pyrdi heiwa lada sdang yaka Medical College kawa ye u hikai ya 50 ngut kiwa lai puræ Doctor, emkaam wow em ha Hospital kawa em 220 tylli ki thaw thiah wei katkam kini ki kyndon wei katkam wa man kattæ ym ye u booh Medical College ha Jaiñtia Hills.
U Nujor da pynbood u deiwa kylli wa lada ka Montri mynjur ko wa ki kaam sumaar sukhær ha Jaiñtia Hills toh kiwa da yoo wyrai bha wa tlot, neiliang ka Ampareen da ong ko wym em mynjur ko yeini.
Neiliang u Nujorki da jubab u deiwa ong wa da yoo u wa ki bru wa em ha Block-I da hap lai ki chadooh cha Jowai manda kjut chitom wei ki PHC wa CHC leh toh ki wym em miat i long i man ki nadooh ki tiar ki tar, ki dawai dachin wei lada bien ka Montri wow lai pait dei khmat yeini.
Ka Ampareen da ong ko wa ka Jowai Civil Hospital da yoh ko 4,900 ngut ki bru wa wan thooh dawai man-u-bnai, neitæ ka MCH Hospital da yoh ko kamwa 2,200 ngut man-u-bnai, wei ka da dep lai ko cha kiwa boon ki thaw sumaar wa em ha Jaiñtia Hills tangwa ym em mut wym emkaam u chong khlem leh de iyi tangwa toh u kreh chitom chooh chooh.
Da pyntip ko leh wa daw booh ya ka Advance Radiology Service ha Jowai Civil Hospital wei da angnood ko leh wow yoo ya kawi ka Medical College ha Jaiñtia Hills tangwa ym nood ko wow kular neibhah wa em boon ki kyndon wa hap u pynhun.
U Nujorki da kyntu u leh wow booh yaka PHC ha Psiar heiwa ki tre chnong da e ki leh yei thaw wa heh palat 4 Acre wei ka Ampareen da pyntip ko wa da em i tyrwa wow leh yeini wei daw pait ya ki kyndon lada ye wow pynku kyrdan cha ka PHC, tangwa yow lait u sepai i pynku kyrdan toh u biang chwa kiwa kreh.
Discussion about this post