U Montri Rangbah ka jylla, u Conrad Sangma hawa e yei jubab wa da kylli da kiwa boon ki MLA hapoh ka yung dorbar heiyatoh waka puræ puthi, da e jubab u ynne wa ka sorkar chimkhia ko yei emkaam wow em ki Higher Secondary School yong ka sorkar ha waroh ki District, ki Sub-Division wei hajrong ini da em i trywa wow pynku kyrdan ya ki Secondary School cha ki Higher Secondary School wei dang pyrkhat ya kiwon wow pynku kyrdan.
Heiyatoh wa ki College sorkar, da ong u wa ka sorkar kwah ko wow pynkreh da ka People’s College Scheme heiwa da ye wow yarap boon ki College da i jooh i lutphut deiwa pynlut ka sorkar wow chimkti ya kawi donhi ka College.
Wei kamwa man kattæ ka sorkar ym em pait ko wow sdang da ki College sorkar wei dang miat wow kyrchaan ya ki College wa pynlai da ki bru samen deiwa su tulop ka sorkar.
Da e nongmuna u ya kam ka Jaiñtia Eastern College kawa da yoh yarap hapoh kani ka Scheme wei ka sorkar kamwa man kattæ ym em ko i thmu wow sdang ya ki sorkar College wa thymme ha iwon iwon i thaw hapoh ka jylla.
Da klam u leh heiyatoh wa dang em ki skur wa ki College kiwa yoh yarap poisa naka sorkar tangwa pteiñ ki wow pynsa’at ya bai lai puræ wei hajrong ini, da pyntip u wa ka sorkar da phah ko ya kini ki thaw lai puræ wow khana katwon chim bai skur bai College ki yow tip kammon u leh.
Heiyatoh waka ITI Khliehriat da pyntip u wa ka Advertisement yow khut ya kiwa wan puræ da dep wow leh wei daw sdang wow e hikai nadooh u Naiynru uni u snem katwa ka yung thymme won daw pyndep u chna chwa u Naikhynde uni hi u snem.
Discussion about this post