U Montri Rangbah ka jylla, u Conrad Kongal Sangma da pynksan biang u hajrong i yoh ksoh ya ki Truck wa kit mooyong pyrchah ya ka aiñ, wei da ong wa kani ka sorkar toh kawa pyrkhiñ bha ya ki kaam pyrchah aiñ.
Da ong wa em boon rtap i pait bniah wow yada nei khayi pyrchah aiñ ya u mooyong, wei pynrap u wa iyi wa da leh toh katkam ka aiñ wa ki kot ki sla, wei ka sorkar ka da pynchitom ko leh ya kiwa boon kiwa leh pyrcha aiñ, wei ym em itæ i sñiawthooh yumut chwa hawa yatoh wa i khayi mooyong pyrchah aiñ.
Da ong wa wot hapyrdi i pynrkhiñ dang em bait ki bru kiwa da pyrchang wow leh tooh, tangwa da ki hajar tylli ki Truck da chah ksoh wei boon ngut kiwa da chah kem, wei da pynrap wa lada yoh wow kem ka sorkar daw leh bait ko deiwa eh.
Ka Hynniewtrep Integrated Territorial Organisation (HITO), ha ka miet ka sngi wa ar da pynman ko yei yang khap ha ka thaaiñ Mawryngkneng yow ksoh ya ki Truck kiwa kit pyrchah aiñ ya u mooyong wei ha ini i kynreh kawa da pynman waroh chi miet da yoh wow ksoh palat 50 tylli ki Truck tangwa da yoh wow ujor FIR ya du 18 tylli, neibhah wa kiwa boon yohlaad ki wow yut noh.
