U Tengku M Marak, State Secretary ka ABVP Meghalaya ha ka khubor wa da phah da ong u wa em i leh chiliang ha ka Result wa da pynbna da ka Education Department neibynta wow man kam ki Assistant Teacher ha ki skur LP ka sorkar wa em hapoh ka Dadengere Sub-Division, West Garo Hills.
Ka yaleh kreh wa da khut toh ya kiwa da pyndep yaka MTET wei yei pyrtuid kiwa yoh kreh khamtam hapoh ka Unreserved Category da pynphylla ko ya kiwa boon wei neiliang ka ABVP da dawa ko wa toh u pynsangeh yei thung kreh deiwa pynman leh ya ka takit kammon da pynmih ya kani ka Result.
Ha kani ka Result kawa da pynbna haka 10 tarik uni u bnai, hapoh ka Unreserved Category da em 34 tylli ki pyrtuid heiwa ym em iwi leh i pyrtuid ki Garo wei na kini 33 tylli toh du ki dkhar Muslim.
Kamtæ ka ABVP da kylli ko wa ileh ym em mo tang uwi leh u Garo næ kiwi ki jaitbru ri-loom ka jylla kiwa stat wei kiwa ye u mih pyrtuid hapoh kani ka Unreserved Category wei ileh nei pyrtuid ki 34 tylli da em 33 ngut kiwa du na kawi donhi ka jaitbru.
Da kylli leh wa kammon du kawi ka jaitbru wa man kawa biang wow yoh yeini i kreh iwa da yoo la kam ka chnat puræ puthi da hikai ko du ya kawi donhi ka jaitbru wei kiyi wow kitkhlieh yeini i leh chilliang wa du kawi donhi ki jaitbru wa stat katwa kiwi won ym em.
Kamtæ ka ABVP da dawa ko wow pynman yei takit wa pliah yow yoh ki jaitbru tre chnong ka jylla yei hok yong ki.
Ka sorkar hawa pynbna ya kani ka Result da ong ko wa i thung kreh man ko deiwa bood yaka Roster System ka State Reservation Policy wei da yoh kreh kiwa da lehbha hadien wa pynman yaka Interview ya kiwa man kam ki Garo/Khasi wa kiwi de ki SC/ST wei ka Result wa pynbna toh neibynta ka Unreserved Seat.
Discussion about this post