U Executive Member (EM) ka chnat Elaka yong ka Khasi Hills Autonomous District Council (KHADC) u Jambor War da pyntip u hapoh ka yung dorbar tlang ka Council wa nadooh u snem 2011 ym em kawi wot leh ka Bill wa da mynjur da ka yung dorbar kawa da yoh yei mynjur na u Lat ka jylla.
Ya ini u Jambor da pyntip u hawa jubab yeiwa kylli wa da wanrah da u MDC ka Congress na Nongstoiñ u Gabriel Wahlang hajrong ki Hima wa da em ya ka aiñ wa ki wym pu em ya ka aiñ yong ki hi wei da pyntip leh wa hadooh katni ki Hima kiwa da em ya ka aiñ yong ki da em hadooh 19 tylli wei ki wym pu em ya ki aiñ da em ki 35 tylli.
Hawa pynche chooh chooh ya ini, u EM wa toh u pait ya ka chnat da pyntip u wa na ki 35 tylli ki Hima, da em 11 tylli ki Hima kiwa ka yung dorbar da pdiang ko ya ki Bill tangwa ya kini waroh da pynuiñ biang cha ka KHADC da ka sorkar.
Hawa jubab yeiwa kylli pynrap wa da wanrah da uwa yahkhmat ka Liang Pyrchah u PN Syiem uwa man leh u MDC ka Mawkhar-Pynthor, neiliang u EM da pynche u wa na ki 11 tylli ki Bill, 8 tylli toh kiwa da pynuiñ da u Lat ka jylla wei 3 tylli da pynuiñ na ka chnat District Council Affairs (DCA) ka sorkar jylla.
U Jambor War da ong u wa ka chnat Elaka da thung ko ya ka ‘Special Committee on Elaka Affair’ yow pait ya iwa emkaam wei i thmu yong ini toh yow pait bniah hawa yatoh wa ki Hima yow pynbait ya ki Bill kiwa ka KHADC da pynkhreh ko.
Hawa yatoh wa i pynuiñ ya ki Bill yong ka KHADC da ka chnat DCA, u PN Syiem da kylli u hapoh kawon ka kyndon aiñ næ Rule yong ka Sixth Schedule wa da pynuiñ ya ki Bill, hajrong ini, u EM da jubab u wa nadooh u snem 2011 ym pu em kawi leh ka Bill wa da yoh i mynjur yong u Lat ka jylla.
