Shillong: U Montri ka tnat puræ puthi, u Lahkmen Rymbui da ong u wa ym em uwi wot leh u khynnah uwa pep skur chiteiñ por ha Meghalaya neiwa da yoh yukheiñ nadooh wa sdang uni u snem 2018.
Hawa jubab yeiwa kylli u MLA ka Mawphlang u Syntar Klas Sunn, lada ka sorkar da ye ko wow e ka hok wow puræ ki khynnah wa hapyrdi 6-14 snem katkam ka Right To Education Act, u montri da ong u wa ka RTE da pynkrehkaam ya ka ha waroh ki skur wa da tipmit da ka sorkar jylla, wei da ong u wa ka sorkar yaleh ko wow pynman ya ki khynnah kiwa 6-14 snem wow lai skur ki.
U montri da ong u wa i em ki bru hapoh ka jylla kiwa da stat da rap ku i tangwa ympu ye u e ya ka yukheiñ kawa tikna.
U Sunn da ong u wa em hadooh 1,09, 495 ngut ki khynnah ha ki kyrdan LP wa UP school kiwa da ieh noh yei puræ ha ki 5 snem wa dadep, wei da kylli u wa lada ka sorkar tip ko wa em ki khynnah kiwa pep skur ha uni u snem, wei neiliang u Rymbui da ong u wa ha uni u snem ym em ki khynnah kiwa da pep skur.
Neidaw wym sñiawhun yeiwa da jubab, neiliang u Sunn da kylli u wa lada na ki khynnah kiwa da pep skur 5 snem nachwa dalai skur biang ki heiwa u Rymbui da pyntip u wa da em kiwa da lai skur biang.
U Sunn da ong u wa hei chem yong oo em 6,14,362 ngut ki khynnah kiwa puræ ha ki LP wa UP kiwa lai skur ha u snem 2016-17 wa 2017-18.
Hawa pynrap lang yeini iwa da kylli, neiliang u MLA ka Umroi, u George B Lyngdoh da kylli u wa lada ka RTE Act krehkaam ko namo ym em ha ki skur ki samen (Private) wow pynduna yei su 25 Percent neibynta ki khynnah wa wan na ki manyung wa duna i yoh, neiliang u Rymbui da ong u wa ki skur samen toh u pynkrehkaam ki yeini tangwa hadooh katni ympu em ki manbei manpa kiwa wan Apply neibynta ini.
Discussion about this post