Ynne ka sngi kawa man ka sngi wa ar yong ka Dorbar Mang Tangka ka JHADC, u CEM ka Council, u Thombor Shiwat da ong u wa ym em kawi wot leh ka karkhana pynmih khyndaw-bilat wa bood ya ki kyndon NOC wa da e ka Council ya ki.
Yeini da ong u hawa jubab yeiwa kylli u MDC ka BJP, u Lakhon Biam.
Neiliang u Krison Langstang uwa man u MDC ka BJP da kylli u wa lada ym em bood ki karkhana ya ki kyndon, iyi iwa da leh ka Council wow pynbor wow bood ki ya kini ki kyndon.
Neiliang u Thombor da ong u wa neiliang ka JHADC da lai yachem ko wa kini ki karkhana wei wow yaklam ya ki.
U Lakhon da pynrap biang u heini deiwa ong wa yooluti wa deiwa rai wow khang noh ya ka karkhana ka JUD, kiwi ki karkhana leh u bood ki ya waroh ki kyndon wa da booh ka Council ya ki.
