U Vice Chancellor ka North Eastern Hills University, u Prof. PS Shukla da kam u wa hadooh katni ym pu em yoh dei thoh na ki Principal wym bien ki u pynkrehkaam ya ka New Education Policy 2020 kamwa da rai ka NEHU.
Hawa yaklam wa kiwa thoh khubor, da ong u wa waroh kiwa lai puræ, ki Principal yong ki College da mynjur ki lait noh uwi ar næ ki liang kiwa da yachem wa oo wa kynthup ya ka HYC, FKJGP, NEHUSU wei ha waroh da pynsñiawthooh hajrong i emkaam wow pynkrehkaam ya ka NEP 2020. “Hadooh katni ym pu em yoh pdiang ya iwon iwon i thoh na kiwon kiwon ki Principal wym bien ki u ya krehlang yow pynkrehkaam ya ka NEP 2020”, da kam u VC ka NEHU.
Hajrong i pyrchah ka Meghalaya College Teachers Association, u Vice Chancellor da ong u wa ym ye wow khut yaklam ya ki tangwa lada wan ki wow yaklam, u pdiang sñiawbha wei da kyntait u wow klam iyi iyi hajrong i pynbaad ka MCTA.
“Nga ym kwah O wow ong iyi iyi hajrong i pyrchah ka MCTA, nga ym ye O wow khut yaklam ya ki tangwa lada wan ki wow yaklam, nga man O uwa da pynkhreh wow yaklam”, ong u Prof. Shukla.
Kam wow pynkynmoo wa ka NEHU da pynmih ko yei pynbna wow pynkrehkaam noh ya ka NEP 2020 nadoh ka 1 tarik uni u bnai iwa da wanrah yei pyrchah na ka MCTA tangwa kiwa boon ki College da lai ki chakhmat wow pynkrehkaam ya kani ka Policy wa thymme heiyatoh wa i puræ puthi.
Chwa ini, u VC da ong u wa ka NEHU da e laad ko chi snem ya kitu ki College lada chem ki wa ym pu ye u pynkrehkaam ha uni u snem ya ka NEP.
Discussion about this post