U heh ka RSS (Rashtriya Swayamsevak Sangh), u Mohan Bhagwat da ong u wa ka Sangh ym em thmu ko wow pynkylla ya ka niam yong kiwon kiwon wei ka ngait ko yei bha i miat manda emlang chiboon.
“I ym em wan i wow pynkylla ya ka niam ki bru neibhah i waroh toh ki Hindu“, da khana u haprang ki paidbah ha ka yalang wa pynman ha State Central Library Auditorium, Shillong ynne ka sngi.
Kani leh da man ko ka sien wa le wa wan u Bhagwat chapoha ka jylla.
Da da ong u chwa u wan ka Mughal wow pynpoor ya ka Islam wa ki British kiwa da wanrah ya ka Christian, ka niam Hindu da em chwa ko.
“Ki paidbah da ong ki wa tieñ ki wa ka RSS daw pynkylla Hindu ko ya waroh. I ym em wan i wow pynkylla Hindu ya kiwon kiwon. I waroh toh na Bharat. Yow man Hindu ym emkaam wow pynkylla ya kiwon kiwon neibhah i waroh toh kiwa man Hindu chwa. I emkaam i wow im deilang wa waroh ki bru. I man i kam ka wi donhi hanla phær i dur i”, da ong chooh chooh u.
Hawa pynche yei chah klam beiñ ka RSS, da ong u wa ka dwar ka RSS toh kawa da wai bait yow ya sñiawthooh kammon krehkaam ka Sangh wei ki wym sñiawsuk ye ki wow mih.
Najrong ki dkhot ka RSS napoh ka jylla, da em leh kiwa yahkhmat ka BJP, ki seiñ Hindu wa ki bru pawkhmat ha kani ka yalang.
