Ym em kyntait ka Ampareen yeiwa em ki MLA ka Congress wa yaklam wa kiwi ki Party

Shillong: Ka MLA ka Congress ka Ampareen Lyngdoh ym bien ko wow ong bait wa em sakhiat næ ym em ki MLA ka Party wa thmu wow lai psiah cha kiwi ki Party kiwa em ha ka jylla hadien wa ka Party da chah rem tput ko ha ka Election MP wa da dep ha ka ri, kawa da ktah joor leh ya ka Party ha kani ka jylla kawa em 19 ngut ki MLA.

Hawa kylli lada em sakhiat ne ym em ki MLA ka Party kiwa thmu wow mih noh wow psiah cha ka NPP kamwa da kaam da uwi u MLA ka NPP uwa man leh u montri u Sniawbhalang Dhar, ka Ampareen da ong ko wa ye u em i tæ i kam yong u tæ u MLA wa da yaklam ki wa ki MLA ka Congress tangwa ka aiñ Anti-Defection Act toh kawa da kdoh ya ki MLA wa ym ye de ki wow mih de na kawi ka Party cha kawi won.

Heijooh i por ka Ampareen da ong ko wa kiyi kiyi ha ka saiñ pyrthai ye ki wow jia wei daw yang ko ya ka por wa biang yow batai ko. Da ong ko leh wa ha kam kini ki por, da em bait i yatan tylle hapyrdi ki Party katwa ye hapyrdi ka NPP næ ka Congress kamjooh wa kiwi ki Party.

Kam kawa yahkhmat ka Congress, da ong ko wa ka Party ka angnood ko wow ya ksohkti wow chna sorkar ha ka jylla ha ki bnai næ ki snem wow wan wow pynlai yaka jylla chakhmat.