Khliehriat: Ka seiñ MPUF-EJH da ong ko wa da sakhi ko yeiwa sdang roi ki truck khadar chaka kiwa mantre da ki baar jylla khamtam ha kithaiñ East Jaiñtia nadooh wa sdang u pyllait biang u challan ya u mooyong sa soo bnai.
Lada ki tai ki truck na baar jylla yoh ki u kamai laitlooid daw poi i por wa ki tre jylla kiwa em truck daw haap dai lilam ki ya ki truck neibhah ki baar jylla kiwa jooh khut sin kam ki munchi daw wanrah ki da ki yong ki hi ki truck wow kit mooyong katwa ngait ki wei lada kamni kammon u jia ya ki tre truck ki tre jylla kiwa ye u thied du ya ki truck 6 chaka.
Ka seiñ da kyrpaad joor ko ya ki seiñ wa toh u pait ya ini wow yatylli yow lait ka kamai kajik yong ki tre jylla u dooh noh yow lait na i chah synchaar ha ki baar jylla.
Chooh chooh ka seiñ da ong ko wa hapoh East Jaiñtia Hills ki baar jylla da yohlaad ki wow leh laitlooid wow seiñ kawon kawon ka jait khih nadooh kiwa khian hadooh ki wa heh neibhah ym em wa khang laad ya ki hadooh ka Jaiñtia Hill Autonomous District Council (JHADC) wa ki bor District leh tip ki yei wa boon ki baar jylla wa leh ya ki kaam be-aiñ tangwa ym em wa leh ya iwa da pynkup ha ki.
Ka Jaiñtia Hill Autonomous District Council kamjooh ki bor district ki krehkaam ki du ya ki tre jylla katwa ya ki baar jylla won ym em lamieñ, wei ka seiñ daw thoh ko cha ka Jaiñtia Hill Autonomous District Council wow ujor ya waroh ki baar jylla wa seiñkhih hapoh East Jaiñtia kiwa khlem ki kot ki sla wa biang hadooh wow chem tre leh lada toh ki tre ri namo ym toh.
Kani toh katkam ka khubor wa phah da u President ka seiñ Meghalaya People’s United Front (MPUF-EJHD) East Jaiñtia Hills District u Michal Chyrmang.
Discussion about this post