U President ka Hill State People’s Democratic Party (HSPDP), u KP Pangniang da ong u wa i mih noh u Sandondor Ryntathiang na ka Party yow lai psiah noh cha ka Voice of the People Party (VPP) ym toh de iwa dang thymme wow tip, neibhah nadooh ka Election ha Sohïong ym em de kwah u wow yakhun.
U Sandondor Ryntathiang uwa ksoh kam u President ka Youth Wing yong ka HSPDP CEC, da pynbna u wa da mih noh u na ka Party, wei ya ka chithi ieh kaam leh da phah ynnin ka 1 tarik cha u President ka HSPDP.
Katkam i pynlait khubor u Ryntathiang, da klam che wa i mih noh na ka HSPDP ymtoh wa em daw u ya ka Party næ ya kiwa yahkhmat tangwa wa em i thmu wow lai psiah cha ka VPP.
Hawa klam ynne ka sngi hajrong ini i mih seiñ u, da ong u wa nadooh rap nachwa da yoo ha ki khubor wa em u ha ki yalang yong ka VPP, wei ka Party ym sñiawphær ko wei da kitbok ko ya oo wow kreh bha hawa kawon kawon ka Party.
Neiliang won u Pangniang da ong u kamwa em kiwa mih na ka Party yow lai cha kiwi won, kamtæ em leh kiwa yahkhmat na kiwi ki Party kiwa wan psiah cha ka HSPDP, tangwa da kyntait won u wow khana yei pyrtuid.
Discussion about this post