U MLA ka Congress na Nongstoin, u Gabriel Wahlang, ynne ka sngi hapoh ka yung dorbar da kylli u wa lada ka sorkar da em ko iyi iyi iwa da pynkhreh deiwa booh bhah ka poisa wow su ya ka tulop kiwa sikai SSA lada slem ka sorkar pyrdi wow pynlait ya ka tulop.
Neiliang u Montri ka chnat Puræ Puthi, u Rakkam A Sangma da jubab u wa ka sorkar da pait ko yeini wei da leh ko yeiwa emkaam.
U Gabriel da kylli won u wa lada ka sorkar daw su ko ka jooh ka tulop cha waroh kiwa sikai kam kiwa sikai SSA, Adhoc ha ki jooh ki kyrdan kamwa yoh kiwa sikai sorkar.
U Montri da pyntip wa ha Meghalaya em boon bha ki jait kyrdan wa da yabhah ya kiwa sikai wei ka jylla da em ko kamwa 65,000 ngut kiwa sikai wei yeini ka sorkar dang pyrkhat ko tangwa kamwa man kattæ ym em poisa wow su ka jooh ka tulop ya waroh kiwa sikai. Tangwa da ong u wa lada biang ka poisa, ka sorkar ye ko u leh yeini.
Heiyatoh won wa ki skur kiwa em du uwi uwa sikai wa kiwa duna khynnah bha, u Montri da ong u wa ym tip u wa iyi i daw wa ki khynnah ym bien ki wow lai ha ki skur sorkar kam ki skur SSA hanla em pyn hajan wa sah ki wei em leh boon ki skur SSA, ki LP School ka sorkar wa em khynnah du hapoh 10 ngut donhi.
Kamtæ da ong u wa u khang ya kini ki skur leh ym toh iwa suk wei ym em mut wa em boon palat ki skur tangwa hadien wa da thung ya ka Meghalaya Education Commission daw ye wow thooh tre ya ki daw wa jia ini waroh.
U Gabriel da kylli wa lada daw pynku ya ka tulop kiwa sikai man-u-snem heiwa u Montri da jubab u deiwa ong wa ha u 2022 da dep wow pynku ya ka tulop kiwa sikai Adhoc, 4th Teachers hadooh kiwa chet-ja Mid-Day Meal kamjooh kiwa yarap wa kiwi de lait noh kiwa sikai SSA.
U Montri Rangbah ka jylla, u Conrad Sangma hawa chimbynta ha ini i yaklam, da ong u wa ha ka mang tangka ha uni u snem da booh bhah T. 2700 klur ya ka puræ puthi, wei na kani, T. 2200 klur toh du neibynta ka tulop kiwa sikai wei lada pynku tulop du T. 100 ka tulop daw poi ko da ki klur tangka neidaw wa em 65,000 ngut kiwa sikai wei ini ym toh iwa suk ya ka sorkar.
Da pynche u leh wa ki skur Adhoc toh ki yong ki bru samen wei ka sorkar da yarap ko ya ki deiwa e ya ka Grant in Aid yow su tulop ya kiwa sikai wei ynnin u snem da dep pynku ya kani ka Grant katwa ya kiwa sikai yong ki skur sorkar won da su tulop da ka sorkar hi heipor wa biang khlem da chah pyndooh tulop ki deiwa pynrap ka sorkar leh u yaleh ko wow pynlait ya ka Grant heipor wa biang yow lait u dooh tulop kiwa sikai.
