U Montri Rangbah ka jylla u Conrad Sangma ynne ka sngi hapoh ka yung dorbar da ong u wa i daw wa heh dooh wym ye ka Mawmluh Cherra Cements Limited (MCCL) wow pynmih katkam i bor wa 600 TPD deiwa leh daka Dry Process toh neidaw wa joor wa khlan sih ki kor wei ym em leh kiwa tip wow pynkrehkaam deiwa leh daka Dry Process.
Da pyntip u leh wa hadien wa joor i pynslem, da sdang yaka Dry Process haka 26 tarik u Naikhynde deiwa lut T. 142.97 klur.
“Ki kor wa da em toh kiwa ye u pynmih T. 1.80 lak MT chi snem iwa mut 15,000 MT chi bnai tangwa kani ka karkhana ym ye ko wow pynmih ya ini,” da pyntip u Conrad.
Da pyntip u leh wa nadooh u Naitung (April) 2017 hadooh u Wisu (Mar) 2020 da ye wow pynmih du kamwa 40,000 MT chi snem iwa ym ye tang wow pyndap yeiwa emkaam ka karkhana iwa da wanrah yei wym dap poisa wow pynchna manda sih ki tiar ki tar.
Ka sorkar leh da yarap poisa ko nadooh u 2014-15 hadooh u 2020-21, iwa da poi T. 177.50 klur.
U Montri Rangbah da pyntip u leh wa da em 126 ngut ki wakreh wa da chim yaka chongngiah (VRS) hadooh u April 30, 2016. Katni ki wakreh da em ki 306 ngut wa kynthup kiwa em hapoh ka Wage Board Category, kiwa wym toh hapoh ka Wage Board wa kiwa kreh Contract.
Da pyntip chooh chooh u wa da dep wow pynlait T.3 klur kam ka tulop ha u 2020 wa kynthup ya T. 1 klur wa emkaam neibynta ka karkhana.
I sah ram ka MCCL toh T. 65.93 klur wa kyntup ya T. 27.09 klur cha ki chnat sorkar, T. 14 klur cha ki Supplier wa ki Contractor wa T. 24.84 klur cha ki wakreh wei yow pynim biang ya kani ka karkhana da emkaam T. 190.32 klur.
Kamtæ da ong u wa ka sorkar em ko le tylli ki laad yow pynkhai im biang yaka MCCL, iwa deiwa e poisa ka sorkar deilang wow pynjoor yei tih marpohkhyndaw, i ya krehlang wa kiwi deiwa e kattu katni i hok mantre cha ki, iwa chitom leh toh neidaw wa em ki krem Mawmluh hajan ki thaw tih moochuni wei i laad wa khaddooh toh wow khang noh yaka MCCL.
“Ka sorkar ym em poisa ko wow sai T. 190.32 klur yow pynim yaka karkhana, u khang yaka leh toh iwa ym ye u pdiang, kamtæ ka sorkar da rai ko wow ya krehlang wa ki Company ki bru samen kiwa bien wow thap poisa ha kani ka karkhana wei ya ini dang yang yei yoh mynjur ka Cabinet yow leh ya ini”, da ong u Conrad.