Kiwa lai puræ hapoh ka lama yong ka NEHU Students’ Union (NEHUSU) da yachem ki ya u Montri wa pait ya ka puræ puthi ha ka jylla, u Rakkam A Sangma yow pynsñiaw wa kam ki khynroo khyllood wa lai puræ ym sñiaw yahaap ki wow pynkrehkaam ya ka National Education Policy (NEP), 2020 ha ka jylla kamwa da pynbna da u Vice Chancellor ka North Eastern Hill University.
Hawa klam hadien i yachem wa u Montri, u President ka NEHUSU, u Ready F Nongbsap da khana u wa neiliang ka sorkar da pynsñiaw ko wa ym pu man wow pynkhreh u pynkrehkaam ya ka NEP ha uni u snem wei da pyntip u wa u Montri da phah u 2 tylli ki chithi cha u Vice Chancellor.
Da khana u wa da kdaw leh chiboon i eh lada pynkrehkaam jhan ya ka NEP ha uni u snem, khamtam hawa ya ki khynnah da pdiang psiah lai puræ ha u Naiynru wei daw wanrah yei eh chiboon wow pynkylla ya ki rukom puræ wa ki lynnong namo ka Prospectus, wei daw hap su pyntam ki leh ya ka bai lai puræ.
Neiliang won u Mandor Lyngdoh Swer da ong u wa lada pyrkhat bha ya kiwa lai puræ ha ki College na ki thaw palatsor, daw maad ki yei eh lada pynkrehkaam ya ka NEP, deiwa pynrap wa i pynkrehkaam ya ka NEP ymtoh iwa sih wei ka NEHUSU ym pyrchah ko, tangwa ka rai wa da chim da u VC man ko kawa jhan chawa palat, wei yoo hi leh wa u VC da leh embor u chawa palat.
Katwa neiliang u Easterson Sohtun da ong u wa i yaklam wa u Montri ka sorkar jylla man ko kawa mihsoh neibhah ka sorkar leh em ko ka jooh i pyrkhat wow pynsangeh chwa ya ini i rai, wei da khana u wa neiliang u Montri da kular u wow thoh da ka chithi kawa le cha u VC wow kyntu pynsangeh chwa ya ini i thmu wow pynkrehkaam ya ka NEP ha uni u snem.
Da ong u leh wow e laad pynkrehkaam ya ka NEP ha ki College kiwa da ye wow leh ym man ko kawa bha neibhah daw wanrah yei ya piah wa i sñiawyaphær ha kiwa lai puræ ha ki College neibhah kiwa boon hi ki thaw lai puræ cha palatsor ym pu ye ki wow pynkrehkaam ya ka NEP.
Discussion about this post