U Shemhok Garod, MDC warim ka Nangbah Constituency uwa man leh u kyrtong wow yakhun yaka Election MLA 2023 naka 3-Raliang Constituency pyrchah ya u MLA wa katni u Comingone Ymbon, haka miet ka 30-11-22 ryngkat ki spah ngut ki paidbah wa chong chnong ka Nangbah kiwa kyrchaan ya oo da lum ki haka yalang wow pynche hajrong ka khubor wa mih haka 29-11-22 kawa ong wa ka chnong Nangbah da rai ko haka dorbar wow kyrchaan wow pynyakhun du ya u Lakhon Biam, MDC ka thaaiñ kam u kyrtong MLA ha u 2023.
Hajrong ini, neiliang u Shemhok Garod wa ki paidbah wa chong chnong wa kyrchaan ya oo da pynche ki wa kani ka khubor toh kawa bakla, neibhah wa ka dorbar wa da pynman haka 19-11-22 toh kawa kynrum kynram wei kawa da kut noh khlem da yoh yei sur u paidbah kawa ya tylli iwi i sur.
“Hei yong sakhiat hi ha katai ka dorbar da em i yatan tylle wa joor hapyrdi ki paidbah neibhah em 3 ngut na kani ka chnong wa mut yakhun yaka Election 2023, chiteiñ ki paidbah toh kiwa neiliang yong nga, chiteiñ won neiliang u Lakhon Biam wa kattu katni cha u Moon Dhar wei i yaklam ym poi ko cheiwon cheiwon leh,” da khana u Shemhok.
U Shemhok da ong u wa da dep e yumut u cha kiwa yahkhmat chnong wow pynman dei ya thap Vote chi sngi heithaw wow khut dorbar khnang wow ye u wanrah sakhiat yei yatylli hapoh chnong wei kat uwa yoh tam ki Vote utæ u man u kam u kyrtong napoh Nangbah, wei deiwa leh kamni oo leh u hun u wow chong lada ki paidbah ym jied ki ya oo.
Deiwa sñiawskem leh lada yoh deiwa thap Vote hapoh chnong, 100% ki paidbah daw jied ki ya oo neibhah kiwa boon kiwa maya ya oo nadooh kiwa kup chiliang, sem chiliang.
Heijooh i por da chim u leh ka kabu wow pynsñiaw cha ki paaid ka 3-Raliang Constituency kiwa maya wow e yei kyrchaan ya oo wei ym toh wow dooh kyrmen ki neibhah dang em ryngkat u wa ki hadooh katni wow yeiñ neibynta wow pynyoh yei hok salonsar khlem iwon iwon i yaphær.
Puræ leh: Khaddooh rai ka Nangbah wow pynyakhun du uwi u kyrtong ha ka Election MLA 2023
