Ka TMC 2-Jowai Constituency ha ka 29 tarik uni u bnai da yoh ko wow pynskem yaka TMC Khliehtyrshi Unit haka yalang wa pynman ha Tyrchi Inn Khliehtyrshi heiwa da jied ya u Saimi Rymbai kam u President, u Esterwell Kharsyntiew kam u Secretary wa u Timmy Ryngkhlem kam u Chairman.
Hapoh kani ka Unit da em 100 ngut ki dkhot deilang wa ki Executive Member wei da em 900 tam ngut ki paidbah wa da wan sakhi ya kani ka yalang pynskem kiwa man leh kam kiwa chong chnong ka Khliehtyrshi.
Da ya emlang leh wa u CEM warim ka JHADC, u Madnonbai Rymbai, u Assistant Waheh Chnong, ki bru waheh ka chnong, ki manbei manpai wa ki khynroo khyllood.
Da yoh leh yei klam na u Madonbai uwa da e ki kyntien kyrkhu kyrdoh wei kitbok kitrwiang ya u Andrew Shullai deiwa kyntu leh ya kiwa chong chong ka Khliehtyrshi wow man ki kiwa stat wow jied ya kiwa mihkhmat deiwa pynrap wa ym em wa ye u pynbor ya ki wow jied ya uwon uwon u kyrtong.
Neiliang u Andrew Shullai da e u ki kyntien khublei wei pdiang burom ya waroh ki dkhot yong ka Khliehtyrshi kiwa da psiah cha ka TMC kam kiwa kreh ka Party kiwa daw man kam chrot ha kani ka Election MLA kawa daw wan ha kini ki sngi.
Neiliang u Assistant Waheh Chnong ka Khliehtyrshi uwa da man leh kam u dkhot ka TMC ha kani ka yalang da pynche u wa kam ka chnong ym em chim rai ko wow kyrchaan du uwi u kyrtong wei em ki ka mon wa laitlooid wow jied ya uwon uwon wei i mih khubor wow kreh wei kyrchaan ka chnong yow pynjop ya u MLA wa katni wa da pynbna da u waheh chnong toh iwa da leh u khlem tip ka chnong. Kamtæ ki ha kani ka yalang kiwa da em kamwa 1000 ngut da rai ki wow kyrchaan ya u Andrew Shullai.
Puræ leh: U kreh ka Khliehtyrshi yow pynpoi biang hei jop ya u MLA, ong u Waheh Chnong
