Shillong: I yang ki paidbah khamtam ki kyrtong wa yakhun wow tip noh ya ka rai yong ki paidbah neibynta i jop ya ka MP Election ha ka ri India waroh kawi da sah sa du da ki kynta wei hawa yaklam wa ki ar ngut ki kyrtong wa ya taan tylle bha na Shillong Parliamentary seat, u Vincent H Pala na ka Congress wa u Dr. Jemino Mawthoh na ka UDP wa kyrchaan da ka sorkar MDA da pynsñiaw ki wa ym sñiaw yahap ki ya i batai ya kiwa daw jop daw rem hapoh ka jylla.
“Nga ym em O i tæ i kyndeh mynsien wow tip chwa yi wow jop wei ngait O wa ki paidbah daw e ki ya ka rai wa bha tam. Ha kiwi ki jylla næ Constituency ha ri India ye u man wa ki Exit Poll ye ki wow man, tangwa haka jylla man ko kawa eh sakhiat wow psiah cha waroh ki dong ki chmiang wow tip ya i sñiaw ki paidbah,” da ong u kyrtong ka MDA.
U Dr. Mawthoh da kyntait u leh yei pynbna wow jop ka Congress ha waroh ar tylli ki Constituency deiwa ong, “Ha i chem yong i hawa lai wa ki paidbah, em i kyrmen wow yoh ya i jop da ki kyrtong wa hunlang ha waroh ar Constituency ka jylla.”
“Heiyatoh wa kani ka Election nga ym em yeiñ O du na kawi ka Party, lada nga jop O daw hap yaklam lang wa waroh ki soo tylli ki Party kamwa da chim lang ya ka rai. I chim lang i ya ka rai kawa bha tam kamwa i da leh i ha ka sorkar MDA lada wan kawon kawon ka sorkar ha Delhi,” da ong u Dr. Jemino.
Hawa yaklam wa u kyrtong ka Congress, u Vincent H Pala da ong wa dang em i kyrmen wow yoh biang ya i jop wei ka yahkun toh hapyrdi yong oo wa u kyrtong hunlang ka MDA.
Hei yatoh won wa ki Exit Poll da ong u wa ym chaniah u yei rukom kheiñ næ i batai chwa ki neidaw wa ym ye ki u lai cha waroh ki thaw nadooh ki nongkyndong wa cha sor.
Hawa kylli lada jop iyi u leh u ha kani ka kynti hadien wa da chong u haka liang pyrchah chi samoi wa ha ka liang synchaar chi samoi, neiliang u Pala da ong u wa lada em haka liang pyrchah næ liang synchaar daw kreh bait u waka sorkar jylla.
Discussion about this post